又到FrenchMay，《法國五月》再度開鑼！自93年起法國駐港總領事館與法國文化協會聯手創辦，迄今已成為亞太區最大型的法國藝術節。不過原來法國文化唔止有蒙羅麗莎，還有出色嘅街頭文化。今勻來自法國塗鴉人EatingDogs就喺蘭桂坊搞咗個法國HipHop文化之夜，原來法國人都可以喺沉重嘅文化包袱之下，嘻哈街頭。香港政府要搞西九龍藝術區前，都要學吓其他國家對文化嘅包容，否則杜Sir又點會同汪阿姐鬧到面紅耳赤呢?!
記者：羅灝汶
攝影：楊錦文
Ceet&MC仁：香港落後法國15年
香港HipHop界MC仁有十多年塗鴉經驗，曾經喺法國留學7年，能操流利法語。小記一知道有知名法國HipHop界代表來港就即時相約MC仁一齊到蘭桂坊打個招呼，原來MC仁早已認識EatingDogs成員的法國同鄉，一打開話匣即時滔滔不絕。MC仁：「我之前未認識Ceet，今日係第一次見面，作為HipHop界朋友，我哋第一次見面都會交流一吓自己嘅歷史背景，好等日後有機會合作，亦係一個最理想嘅文化交流。」
兩人見面雞啄唔斷，話題都離不開塗鴉藝術。Ceet：「今次是首次組團來港，將會去酒吧林立的蘭桂坊作街頭塗鴉表演。其實我現時定居深圳，大部份時間與國內HipHop界朋友交流，我同MC仁都認為中國大陸同香港的HipHop文化，相比外國起碼落後10至15年。雖然香港人的衣着緊貼潮流，不過佢哋唔明白當中意義。」
法國比香港自由
MC仁：「我好同意Ceet所講，因為香港人太過保守，衣着大膽極都係跟風，失去咗自我、冇風格。今次我唔係為咗幫EatingDogs個騷宣傳先至走出嚟，其實真係愛街頭文化嘅人好應該企出嚟，因為一定要有直接交流先可以推動街頭文化！唔信你睇吓，到時實會有好多觀眾到場，不過都係睇『鬼佬』做騷，根本唔識去了解文化背後嘅意義，只係盲目附和，所以香港文化咪冇進步囉！見到個個公園都裝晒攝錄機就知咩事啦！」
Ceet：「我哋去到法國街頭，唔會有太多人阻礙我哋噴畫上牆壁，反而鼓勵我哋去做。但係見到香港好多塗鴉都係偷偷摸摸，我覺得香港政府對街頭文化監管得太嚴喇！今次我哋都要經過好多重手續先可以申請到喺蘭桂坊噴畫，其實咁樣真係好影響本地創作。」
多謝Ceet，摑咗我哋香港政府兩巴！
EatingDogsTour
日期：5月13日6:00pm至深夜
街頭塗鴉表演：10:00pm至深夜
地點：蘭桂坊Cclub,California,Lux
票價：全免（街頭表演）、$100-$200（室內場地派對）
Ceet係乜水?
Ceet的名字（發音City）經常與T-Kid、Cope、Toast、TatsCrew、Seak、Daim和WonKapis等其他國際級塗鴉大師相提並論，絕對大有來頭。著名運動品牌adidas，自1999年至今便委任他為旗下藝術大使，他最愛向高難度挑戰，曾經創作出多幅高難度的即場塗鴉作品。除咗參與大型壁畫及油畫創作，Ceet更瓣瓣掂：自組樂隊Truskool，立志透過創作去宣揚藝術文化；曾建立自家街頭服飾品牌ElCamion；他更一直以化名ColonelDouchafleur，擔任唱片騎師工作。
黃志淙：期待爆炸性即興音樂
由5月1日至6月21日期間，法國藝術節有齊歌劇、多元藝術、舞蹈、音樂、話劇、電影、視聽娛樂、展覽等跨媒體選擇，我哋一於搵番跨媒體文化人推介佢哋嘅心水！一向鍾情法國電子音樂的黃志淙，在整個藝術節中揀出三大ChiChung'sChoice：
推介1：《法．電．港》
「絕對係音樂人推介力作，當中嘅音樂元素有好多，糅合咗Breakbeat、NewWave同LowFidelityChip的音色，有一流DrumNBass。大家到時可以好好感受一下法式電子音樂嘅特別之處。」
《法．電．港》
日期：5月26日9:00pm
地點：德己立街VOLAR
票價：免費入場
推介2：《爵士樂的創作：法國視野》
「音樂方面我會推介呢個節目，當中一位叫PeterScherr嘅DoubleBass樂手，係我嘅好朋友。另外我知道巴黎首席即興鼓手EdwardPerraud同大提琴家DidierPetit，會聯同PeterScherr、JoeRosenberg合作演出，我相信一流爵士樂手往往都有出人意表嘅爆炸性演出。而且今次表演係即興表演，可以畀音樂家完全自由發揮。加上佢哋全部都係即興大師，可以達成最好嘅法、港交流。
《爵士樂的創作：法國視野》
日期：5月6日9:00pm
地點：藝穗會
票價：$180,藝穗會會員$150
推介3：《極限》
「《極限》曾經來港表現，不過我Miss咗，今次一定唔會再錯過。最新的《極限》入面，唔會再利用龐大摩托隊同大型壯觀的舞台吸引觀眾，反而採用咗嚴肅簡約嘅舞台設計，同以往風格有好大出入。」
《極限》
日期：5月7日8:00pm
地點：香港文化中心大劇院
票價：$360,$280,$160,$100
梁文道：看一本字典的誕生
推介1：《利氏漢法辭典的溯源》
「《利氏漢法辭典的溯源》絕對係史上最大規模嘅漢法雙語辭典展覽，以前好少機會可以睇到一本字典嘅誕生，今次一定唔可以錯過，就算睇DiscoveryChannel都睇唔到！展覽大概講述當年法國耶穌會教士，為傳揚教義而開始了《利氏漢法大辭典》的編制，估唔到最後係促進咗中歐文化交流。一本辭典製作可以歷時52年，至2001年尾先至出版，今個展覽可以全面解構由來，又可以加深文化認識，絕對係今個《法國五月》必睇展覽。」
《利氏漢法辭典的溯源》
日期：5月16日至5月27日9:00am-8:00pm（每日）
地點：香港大會堂一樓展覽廳
票價：免費入場
推介2：《龐比度中心前衛經典》
「達達風、建構主義、新達達、超現實主義等法國劃時代的電影製作，當中的作品我大部份都聽過，不過一直冇機會睇到。要欣賞另類節目呢個係嚴選推介，以往喺香港冇乜機會可以集中睇到50's法國電影，今次就連藝術大師達達主義、字母派導演都可以睇得到，佢哋話晒都影響咗全個歐洲藝術發展呢！」
《龐比度中心前衛經典》
日期：即日起至5月14日
地點：香港電影資料館電影院、香港藝術中心Agnesb.電影院、香港太空館演講廳、香港科學館演講廳
票價：$50
《法國五月》查詢：www.frenchmay.com
