睇波當然唔只係睇球員睇入波。球迷除了談球員技術，也喜歡評論評述員，好嘅評述，渣波睇到瞓着都被佢笑醒。世界盃將至，今日就來個街坊直選，選出最佳「講波佬」屬誰，事前還以為一定是即將退休的阿叔林尚義大熱當選，但答案竟然係香港人毋忘伍晃榮！
記者：曾冠輝
攝影：陳陶鈞
黃興桂「最差」
選阿叔和Keyman為最佳「講波佬」非常正路，前者經驗老到，後者後生啱嘴形，問街坊（唔係問忠實球迷）原來唔係人人都聽過佢哋講波，相反伍晃榮報道體育新聞就人人聽過，連女生都大讚用語抵死。而黃興桂就大熱當選最差「講波佬」，不過話雖如此，佢嘅說話又的確幾深入民心，一句「蔗渣嘅價錢踢出燒鵝髀啲味道」已足夠家傳戶曉。
問題：
Q1：你覺得最佳「講波佬」是……
Q2：你覺得最差「講波佬」是……
Q3：最深刻「講波佬」說話是……
Ken22歲（阿根廷躉）
Q1：Keyman。
Q2：黃興桂，佢講波簡直係廢話連篇。
Q3：曾偉忠「猴年獻金猴」爆粗嗰句，都算經典。
程先生30歲（英格蘭躉）
Q1：Keyman，佢知識比較豐富。
Q2：阿叔，佢都老啦，講波有啲呆滯。
Q3：我覺得有線劉舜文作啲世界盃宣傳歌幾得意，佢講波時嘅用字亦都好特別。
Jack20歲（英格蘭躉）
Q1：伍晃榮，佢算唔算㗎？佢退休後一直都好懷念佢報道足球新聞嘅方法，如果佢出嚟講波就正啦！
Q2：TVB帶眼鏡嗰個……好似叫鍾志光。
Q3：一定係伍晃榮「朗拿度好波嗰陣真係好好波㗎！」
Wilson22歲（德國躉）
Q1：伍晃榮。
Q2：黃興桂囉，佢講波好似亂嚟咁嘅。
Q3：伍晃榮嗰句「球場上有乜嘢衰得過輸兩球波？就係輸三個波嘞！」
Sunny21歲（巴西躉）
Q1：梗係阿叔林尚義啦！
Q2：CK（即係邊個?），之前亞視嗰個何靜江，佢講得有啲悶。
Q3：「蔗渣嘅價錢踢出燒鵝髀嘅味道」，好似係黃興桂講嘅。
Candy24歲
Q1：我好少睇波，聽得最多就係伍晃榮講波，佢講得好搞笑。
Q2：亞視四眼嗰個，（張丕德？）係，佢帶眼鏡好似懶斯文咁，其實又唔係。
Q3：黃興桂：加利仔有三個問題，第一跑得慢，第二唔夠快，第三速度唔高。
阿餅24歲（英格蘭躉）
Q1：阿叔囉，細個就聽佢講波，講得好專業。
Q2：黃興桂，成日亂咁講嘢，講嘅嘢都唔關場波事嘅。
Q3：02世界盃，有球員下陰中招仲繼續追波，黃興桂嗌：「嘩！不死鳥呀！」
講波佬發展史
「講波佬」並非新興行業，五、六十年代已經開始有足球評述員，只是當時電視還未有直播球賽，他們主要於電台主持本地球賽節目，透過大氣電波以「生鬼」用語形容球賽，讓收音機旁聽眾感受賽事的緊張氣氛，著名的電台「講波佬」有何文光、何鑑江、何靜江。
說到用字，本地「講波佬」更是自成一格，用字精闢貼切，單單一個波，何只「盤、傳、扭、射」，仲有「斬、的、質、頂、篤…」等十幾種用字，都能讓聽眾想象到球員的動作，又如「醫院波」更是歇後語…形容傳球「唔湯唔水」，而這些術語仍一直沿用至今。至八十年代，電台足球廣播隨着電視足球轉播而逐漸式微，89年商台放棄廣播本地足球賽事，「講波佬」正式由電台跳到螢光幕前。
最好笑講波佬─黃興桂101語錄
街訪中不時聽到被訪者引述黃興桂的「無厘頭」用語，其實早已有網友將他的名句輯錄成《黃興桂101語錄》，當中不少都是耳熟能詳，再看一樣會笑，有興趣可到以下網址一看：
http://forward.hkwebs.net/post/1/587
