李安近日抽空返咗台灣為媽咪賀壽，不過噚日已經低調離開咗台灣。李安前晚喺台灣去睇舞蹈表演《尋夢》，主要係捧著名舞蹈家兼好友羅曼菲嘅遺作場，李安睇完好傷感，突然痛哭起來，好鬼感性。
李安突然喊起上嚟，大家都不知所措，直到雲門藝術總監林懷民上前安慰佢，李安先止咗眼淚。
李安事後話：「因為見到很多老朋友，想起很多故事，才會有感而發。」馮仁昭八到其實李安嘅感觸係因為見到羅曼菲前夫阿湯哥，一度憶起亡友先至悲從中來。中場休息時，李安先開心番，仲話：「羅曼菲舞者帶得好棒，這些舞都比電影好看多了。死亡是很美麗的，羅曼菲不會希望我們哭哭啼啼送她。」
張艾嘉捧場
前晚除咗李安之外，張小燕、張艾嘉、徐璐亦都有捧場，而羅大佑同前妻李烈離婚多年，佢哋前晚都首度同場出現，分坐觀眾席兩邊，散場時羅大佑仲走先，呢對前任夫婦都冇嘢講。
演出結束前播放咗羅曼菲演出嘅《輓歌》錄影帶，請觀眾喺舞台前插上羅曼菲最愛嘅跳舞蘭，好多嘉賓獻花時都已經眼紅紅。
