成班老友食飯，突然間一位財務F提起：「側聞大科學家嘅二十零歲太太有喜，大科學家可謂破咗燊哥紀錄。」財務F語出驚人，唔知真定假。不過佢平時好少講錯嘢，可信性比較高，所以大家唔敢駁佢；退休賓架就話：「燊哥位公子，好似已經十零歲，燊哥就年過八十，即係話燊哥七十歲之後仍有精力。大科學家今年八十以上咯喎，如果財務F所言屬實，佢重巴閉過燊哥。」
大科學家可能老早修心養性，養精蓄銳呢，呢類天才，實屬人類精品，為咗科學、為咗後代，不妨留下多啲遺傳基因喺中國，以拉高中國人平均智慧，避免出現「劣幣驅逐良幣」呢種情況。
講起臨老得子（女），行街鄭有一段故事。佢識得一對事業成功嘅夫婦，三十幾歲之時，經過多番體檢，醫生宣布佢兩人唔會生到仔女。男士嘅阿媽幾乎要迫佢喺出邊搵二奶，包生仔，男士死都唔肯。女士失望之餘，去某機構收養一位趣緻BB，男士當然同意，視為己出。好嘞，眨眼間過咗二十年，女兒聰明過人，亭亭玉立，到外國讀大學，成績好好。突然間有一日寫電郵問父母：「我好感激爹哋媽咪養大我，對我咁好，但我嘅『生物雙親』（biologicalparents）（洋化名詞，即係生父生母）究竟是誰？我想尋根。」父母如受雷擊，心中百般不願。點知有咁啱得咁蹺，某機構來電通知，女兒之生父母到機構尋女，聲言後悔當年因貧窮而棄養女兒，現在生活無憂嘞，好想與女兒重新聯絡，某機構唔答應，但將生父母之訊息通知呢對夫婦。行街鄭話：「我呢位老友現在已經五十幾歲，生活無憂，最惜個女，現在佢與太太好驚個養女捨佢哋而去，走返親生父母嗰度，你知啦，壯年時無法生育，將近退休時，養女離去，受唔起刺激啫！」
同類問題，老早在美國湧現，特別係一啲女性單親不結婚嘅媽咪，飽受長大成人嘅女兒或兒子壓力──不停詢問爸爸係邊個！如何圓滿解決，考起心理學家、社會學家。