某日筆者與朋友談及自己的「電影扑」，佢覺得我寫得太沉重而且愈來愈「老餅」，從來都只會講舊戲，而且局限於某幾類型電影……OhmyGod！筆者一向懷舊，往往對新嘢都唔係太睇得過眼，而且科幻片、戰爭片、搞笑片一向都係男仔專利㗎啦，你叫我寫愛情電影，又真係放唔到個心落去，點會有共鳴呢！近日來娛圈熱話都係杜Sir大戰汪阿姐，一向敢言嘅杜Sir又真係睬你都儍，諗諗吓我唯一睇到喊出嚟嘅港產電影竟然係杜Sir嘅《我左眼見到鬼》……P.S：朋友！唔好話我個人冷血冇感情喇！
記得當年女友要求我陪佢去戲院睇，我心態係鬼片之嘛，睇吓咪算囉！點知我竟然為王勁威（劉青雲飾）流出第一滴戲院淚……片中鄭秀文念念不忘她的死去前夫，想保留前夫遺下的所有，有次女主角自殺不果，從此左眼就見到鬼。整套戲笑位相當充足，但最令人意外就係最後的結局，原來一直陪伴鄭秀文的王勁威竟然係她的死鬼丈夫！那一幕奈何橋，鄭秀文憶起前夫一直假扮小學同學王勁威，我真係忍唔住喊咗出來。片中主旨一直提到不要用時間去衡量愛情，的確好有心思，誰說7天的愛情就不可以天長地久？
有人拍拖10年，最後都係分手收場，有人相識相戀到結婚都只不過半年，卻能相愛到老，原因可能個個不同，因為愛情是很個人的事。愛情中有一個好態度絕對係冇嘢衝破唔到嘅！睇電影對於學習人生係非常好的事呢！原來流淚不是羞愧的事，因為我知道自己係一個有血有肉嘅人。
