呢本《LIV》響富豪陳列室可以攞到，印刷精美，而且講求美術設計，唔多似一本車書。睇得講車嘅雜誌多，《LIV》咁另類嘅雜誌，畀人耳目一新嘅感覺。
S40內95%零件合乎環保
先嚟頭條情報有新S80，V8偈行恒式四驅，好勁咁喎，內容當然係以美學角度出發喇！之後係S40，不過拆散晒，好簡單，廠方想話你知，裝嵌S40車身嘅零件大都合乎環保原則，製作時減少用水銀、鎘、鉻等等。睇多啲，嘩！全車有85%嘅部件，包括：輪胎、塑膠、玻璃都可以循環再用；而另外嗰10%可作焚化處理。講到尾，《LIV》全書內容都係想車主多啲注重環保，平時最好將愛車送返去原廠或者認可零件供應商處做維修保養。
TestDrive環節由RussSwift教泊車，佢係最小S位泊車世界紀錄保持者，只要預留比部車長33cm嘅車位，佢就可輕鬆咁一次過泊到。RussSwift今次就教呢種神奇嘅ParallelParking，即使只係剩番些少位，都可以將架車「擺」入去，唔明？有埋圖文並茂，慢慢鑽研！不過，睇完就千祈唔好喺街有樣學樣，分分鐘俾阿Sir告你危險駕駛！
記者、攝影：戴維浩
