沙田馬場聽日會跑冠軍一哩賽，11匹本地良駒會接受3匹嚟自阿聯酋、澳洲同英國嘅外隊馬挑戰，爭奪冠軍寶座。焦點所在莫過於喺今季贏咗6場嘅「勝利飛駒」，同埋算半個兄弟（同父異母）嘅馬王「精英大師」同場惡鬥，如果「勝利飛駒」再下一城，就可以創馬會有史以來，1季贏7場頭馬紀錄。
「勝利飛駒」馬主江建權長期喺內地做冷氣機生意，一向都好低調，佢早排俾《蘋果》馬版同事，影到同煲呔個仔曾慶衍一齊慶祝「勝利飛駒」贏頭馬嗰個興奮樣，但江馬主始終唔肯講同曾慶衍有乜關係，可能費事畀人講閒話啩。
講番場馬，如果「勝利飛駒」贏咗，更有機會問鼎季尾嘅馬王寶座。八方都希望本地馬可以贏到冠軍一哩賽，為港爭光。
傳真︰2623-9278
電郵︰[email protected]