波鞋Guide：adidas發舊財翻出高比仔復刻

近期日日都要對住世界盃嘅產品，搞到每次介紹球鞋都離不開國家隊又或者明星球員戰鞋，的確冷落咗一班熱愛NBA嘅籃球友。須知NBA剛剛踏入季後賽，個個球員都搏晒老命，為名利而戰！而且每年NBA一入直路都有好多新色、新款嘅戰鞋登場，就算世界盃風頭蓋過晒NBA，但都不減一眾SneakerFans對新鞋嘅熱切期待。全新上場有adidas高比復刻戰鞋，去片！
記者：羅灝汶
攝影：陳陶鈞

「有冇搞錯！新色復刻波鞋有咩特別呀？」「仲要係adidas推出，高比仔都過檔NikeN年啦！」等等！大家唔好噓住！今次adidas推出復刻鞋的確唔係大件事，特別之處係呢對復刻鞋元祖版（黑、白色），5、6年前曾一度炒高至$1,500，而且斷貨後一直冇推出復刻版本，加上行貨亦無正式上架，搞到當時唔捨得入手嘅人，今時今日先知道後悔。
當年高比仔就係着住佢同各路英雄激戰連場，今次推出嘅復刻版本就有新色粉藍同紅色兩款，據聞元祖黑白、全白及特別版紫白亦將會陸續推出，由於只限美國上，所以要密切留意水貨時間，暫時香港都唔會有行貨推出。

2002年7月15日美國NBA湖人隊高比拜仁（KobeBryant），宣布同合作6年有多嘅adidas「拆夥」之後，就搵咗波鞋界大哥大Nike成為新贊助商。2002年之前高比仔都仲係着住「KB8」南征北戰，自從高比仔成為Nike代言人，adidas就將高比仔一直着嘅「KB8」改名為「CRAZY8」。其實今次adidas搞「CRAZY8」復刻，有啲似家吓啲唱片公司，當旗下歌星過檔新公司出新碟，自己即刻推新歌加精選食埋條尾水咁解。皆因「咁蹺」隔籬Nike推出KobeSignature，世事係咪真係咁巧合呢？
高比「CRAZY8」系列除咗成為一眾adidas贊助嘅大學球員嘅戰鞋外，就連效力鷹隊的2005年入樽冠軍JoshSmith今季都有穿着「CRAZY8」系列，可見「CRAZY8」系列都係今季adidas嘅力谷鞋款。

■著名網上訂購波鞋網頁，「CRAZY8」都係重點推介之一。（footlocker.com）

■今季JoshSmith都有穿着「CRAZY8」系列上陣。

■TorsionSystem提供足弓穩定支撐的力量，強調柔軟避震的籃球鞋，難怪有波友推介為最舒適打街場嘅籃球鞋啦！

■業界稱粉藍色adidasCRAZY8為北卡大學隊顏色，因為北卡大學的球衣顏色是以粉藍做配搭，不過其實真正的北卡大學是由Nike贊助。

■鞋舌繡有高比仔球衣號碼「8」字，畢竟數字無版權，所以adidas可以食番條水。

■鞋尾部份藏有兩條橡皮帶，元祖版中腳踝部份比較寬鬆，所以要用鞋帶穿過橡皮帶，扣緊腳踝防止扭傷；復刻版改良後令到腳踝位置收窄，加強保護功能。

客人阿芬：紅色CRAZY8非常舒服，其實呢款鞋好適合打街場，因為TorsionSystem個避震做得好好，雖然唔係新技術，不過都係自己最鍾意嘅鞋款。