自從03年7.1大遊行之後，中聯辦主任高祀仁就算蒲頭，都好少會開腔做評論，應該都係怕講多錯多。噚日喺佛教聯合會搞嘅佛誕大會上，有記者唔信邪，走去問擔任主禮嘉賓嘅高主任，點睇中梵關係，仲有陳太聲稱被抹黑嘅事。
結果？當然係食白果啦，不過今次高主任都仲有少少新猷，佢雙手合十，回應「阿彌陀佛」，真係好鬼應節應景啫。
鄔維庸話自己烏卒卒
除咗高主任，本身係基督徒嘅肥平都有出席佛誕大會。佢仲又一次放低宗教包袱，不過今次唔係求籤，而係為大會主持佛教鳴鐘儀式，但就冇好似其他嘉賓咁去浴佛，可能費事再俾人質疑佢嘅宗教立場啩。肥平致辭時就講到，佛教導人改惡向善、潔淨身心；唔知一班政府高官，有幾多個都擁有呢顆佛心呢？
查實唔止高主任，就連擔任嘉賓嘅鄔維庸，都同八方大講佛偈。問佢陳太係咪被人抹黑，鄔醫生話好多人不抹自黑，好似佢自己咁，否則點會姓鄔，即係烏卒卒咁囉！問佢陳樞機應唔應該講咁多嘢？佢就話大家要以平常心看待所有事，最好當娛樂新聞咁睇，咁就唔會覺得有問題喇。呢一番無厘頭佛偈，睇怕淨係得佢至聽得明！
傳真︰2623-9278
電郵︰[email protected]