有獎攞：港仔賣肉博獎輸咗！

用「賣肉」形容浸會大學舉辦的第4屆「大中華大學生影視獎」，好像有點涼薄，但2套港產作品又確實與「肉」有緣。《我愛裸體》男男女女全裸上陣無格仔，可惜未過電檢已被台灣學生技術性擊倒，輸了；另一套《那年曇花開過》是12個獎項中唯一獲獎港產作品，導演阿偉卻自嘲：「我得嘅係豬肉獎？」雖然有線電視會播放頒獎典禮及得獎作品，但Sorry，前者敗北後者基於版權問題無得播，我有幸看齊2套足本作品，你只可欣賞報紙片段硬照，又或密切留意演藝或浸會幾時搞分享會吧。
記者：陸伊琳
攝影：林栢鈞、何家亮、黃子偉

■《那年曇花開過》是多個電影節入選作品，又曾取過第11屆「香港獨立短片及錄像比賽公開組特別表揚獎」，問難忘花絮，李志偉說：「2位小朋友喺海灘吹足成日風，嗰日得十幾度，小演員捱唔住喊走。」

■《我愛裸體》曾入選「北京電影學院第4屆國際學生影視作品展」，陳兆忠說：「用裸體做題材唔係博搶鏡，只係覺得天體係個好Topic，可以挑戰各地電影展嘅尺度同同學嘅接受能力。」

被喻為學界奧斯卡的第4屆「大中華大學生影視獎」，有中、港、台、新加坡及澳門多達45間院校參加，作品超過100部，評選類別分實驗片、動畫、劇情及紀錄片，頒獎禮於上星期舉行，賽果力證主辦單位浸會大學沒造馬，因浸會同學的作品全軍覆沒，香港只憑演藝學院同學李志偉的《那年曇花開過》獲得劇情片組別的「評委會特別獎」，內容講述一對父子在暑假發生的故事，爸爸想兒子出國留學，但兒子只顧終日玩樂無心出國……李志偉自嘲：「呢套作品係我嘅畢業功課，拍得靚好有Mood，但不足之處係故事薄弱，分鏡唔夠清晰，所以參加過好多頒獎禮都未贏過大獎，攞嚟攞去都係啲甚麼特別獎，即係豬肉獎！」

■導演李志偉：「咪亂諗，故事唔係我寫照。」

另一套港產搶眼之作《我愛裸體》題材敏感拍攝大膽，可惜最後落敗，導演浸大電影電視系研究生陳兆忠說：「我走訪學者、議員同街坊，邀請3位『人體藝術協會』（又稱「天體會」）會員演出，跟足佢哋個幾月，希望拍到天體愛好者嘅生活模式。」3位主角包括「天體會」會長Simon全裸演出，「呢套作品係我舊年嘅功課之一，內容圍繞設立合法天體區嘅可行性。我挑戰尺度，佢哋喺屋企全裸睇電視、聯誼，甚至行山都盡入鏡頭。套片一定係合格作品，要挑剔嘅係時間太短，遺憾在只得個幾月時間跟Simon，未能夠將人物完全立體起嚟，一條好嘅紀錄片，真係好花時間去製作同籌備。」

■導演陳兆忠：「我贊同天體，但接受唔到自己參與其中，如果要我裸埋一份先肯拍，我會縮沙。」

■我們一起欣賞《我愛裸體》，我是女人，但出奇地沒有尷尬感。

■會長Simon：「我初初拒絕拍攝，但阿忠講明以學術性出發，唔含商業成份，我先肯拍。」

導演莊文強大讚今年的作品極有水準：「台灣學生嘅作品，喺故事及技術上都有好大進步。」至於今屆港仔只分得1個豬肉獎，評審員之一的導演張虹則說：「台灣學生嘅作品故事性強技術又有水準，香港學生有技術但欠缺創造性，可能同閱讀習慣有關，台灣人熱愛閱讀，香港人呢？少之又少，肯花心機睇電影嘅香港學生都太少，咁都會影響創作能力。」

■導演張虹：「香港學生輸在閱讀少，又少睇電影。」

■導演莊文強：「學生多咗機會同渠道創作，值得鼓舞。」

頒獎禮當晚不少名人、導演空群出席支持，包括民政事務局局長何志平、浸大校長吳清輝、許冠文、劉天賜、徐小明、任達華、莊文強、羅啟銳、張婉婷、吳思遠、馬偉豪、張同祖等等，每位都好歡迎學界多搞這類活動，有助推動電影業兼發掘更多人材。

■馬偉豪：「有線參與呢個活動好有眼光，可以畀大眾接觸到佢哋嘅作品。」

■任達華：「呢個活動可以發掘多啲有創意的新人。」

頒獎嘉賓有大導、名嘴，台上發言偶有佳作，如許冠文的啜核諷刺：「要救香港電影業，首先香港編劇要走晒去荷李活工作，拉低佢哋嘅水平！」另一巴閉之處是壓軸表演嘉賓竟是人氣急升的吳國敬，他笑言：「好耐都無上過台唱歌，發台瘟。」最後連唱2首經典金曲。

■頒獎嘉賓極有份量，許冠文更發揮搞笑本色。

演藝學院及浸會分別派出學生表演，前者表演現代舞，少一點藝術細胞都看不明，悶透！後者夾Band大唱80年代雞尾歌，3位主唱的男同學西裝骨骨，與背後的RockBand格格不入，高音走、低音差，又入唔到Key，浪費背後的Bandsound。

大約只有一半得獎者現身頒獎禮，頒到「優秀動畫獎」，一位代領獎的同學打死不願落台，不理現場PA打圈，一輪嘴說出感謝詞，又話好遺憾自己唔係得獎者，場面搞笑。