甫播出即熱爆全城的《火舞黃沙》，除深得娛圈藝人歡心外，亦成為市民每晚送飯必吃的「好餸」，而林保怡和蔡少芬更成為觀眾心目中的至愛。
Victoria（17歲）
「女仔我鍾意黎姿，本身我都好鍾意佢嘅，同埋佢做戲都好逼真，好似佢咬斷馬賊條脷，真係做得好似㗎！男演員我鍾意林保怡，佢做得好惡，神情好似。」
簡小姐（24歲）
「蔡少芬做得最好，好投入，以前都有睇佢嘅劇，佢做嗰個最突出。男演員我都係揀林保怡，佢做到真係好似好惡咁樣，而且摑黎姿真係好勁好真。」
謝小姐（18歲）
「我覺得蔡少芬好似未做過呢啲咁嘅角色，見佢咁惡，真係覺得好新鮮。林保怡都係做得好兇，平時佢個樣都唔似咁惡嘅。呢套劇我實會追落去，我畀75分。」
鄭小姐（33歲）
「平時我都睇蔡少芬嘅戲，今次覺得佢做呢種類型角色都做得好自然。男演員我一定會揀黃德斌，因為我向來都鍾意佢嘅，佢嘅劇我實會睇。」
採訪：王連連 攝影：陳偉權
