剛剛過去一星期為咗一篇法國藝術節嘅題目同咗好多人傾偈，雖然吹水都吹到口乾，但得着不少，眼光思想都有所改變！其實自己一向對法國人冇乜好感，覺得佢哋高傲自大，漠視其他民族，所以我從來對呢個地方都冇乜興趣。直至今次訪問後，我發覺法國人真係有一個唔錯嘅優點，我行我素之餘，亦會好尊重其他人嘅個人風格同想法，唔似香港人永遠都鍾意對其他人評頭品足。久而久之，香港慢慢已經形成一股呢期興就全街都係嘅風氣。
日本少女雜誌《CUTIE》一向唔係我欣賞嘅雜誌，入面嗰個Styling永遠都誇到不堪入目，邊睇邊鬧：「喺香港咁着！俾人笑咗十世啦！」但經訪問之後，發覺唔同Style出現總有其存在價值，轉個角度一看，一樣可以以欣賞嘅眼光去觀察呢班妹妹嘅衣着打扮。有容乃大，嘗試放開自己接受不同人嘅想法都不失為好事，這一刻嘅心情令我對今期6月號《CUTIE》另眼相看。當然吸引之處莫過於有條幾靚嘅《Kissofdeath》橡筋繩送，起碼夠晒實用先！
