《以和為貴》的美指夠搞鬼，搵到樓梯可以拍恐怖片的古董建築物做鄧威養老的住所。那條旋轉木梯，成了長命斜老人殺手，阿樂輕手一推，老鄧就像人肉燒賣滾下樓梯。老人家點會入住這種攞命屋，就算冇二五仔暗算，自己頂住個糖尿大肚腩，隨時都會差錯腳送命。美指擺佈黑社會老叔父到盡，再玩死鄧伯，有推一國兩制落樓的象徵喻意，比唯恐天下不亂的鄔維庸更政治不正確。
古天樂矢志爭奪龍頭棍，安排老婆隱居元朗的村屋，四圍綠田葱葱，肯定沒有地產商夠膽鏟樹圍地逼害村姑。村屋內有薄紗窗帘，古老妝鏡，一室雖簡而雅，跟這個新紮話事人不搭調，難有crossover效果。美指要玩品味controversial，好彩還算公道的是，將馬經版塞給古天樂，不是叫這個全套靚西裝日日用Clinique護膚的大佬，在座駕裏一邊讀愛國《文匯報》一邊叫司機停車，救張家輝飾演的難兄難弟一命。那份摺埋的馬經鏡頭裏一秒過，應景的話，應該選讀《成報》。
美指可能還有任務，就是替導演recruit茄喱啡。做古天樂司機那位，完全唔似黑底，秤埋冇三両肉，無可能替大佬擋風擋雨。向任達華施以亂棍的幾個貼身保鏢，頂籠在銅鑼灣夜場代客泊車，唔打得亦唔睇得，這種馬仔，大佬點會收貨？林雪也是臨時演員出身，得杜琪峯提攜，戲路慢慢摸通，當差和行蠱惑都掂，可能是最後一個老臨界的傳奇。杜琪峯要外行的美指幫手選角而失手，無暇分身的原因，可能是，忙住跟有成班叔父撐的阿姐開片！《以和為貴》！