船務C太太月前去文化中心睇機管局公關靚女魏綺珊做戲，「靚太唔易做」，睇到一頭霧水，話唔知套劇講乜，船務C與左丁山講起，左丁山笑曰：「可能有代溝都唔定。」該劇劇情大概係：魏綺珊飾演靚太，一日老公對佢講，結婚耐，悶悶哋，不如大家開放啲，各自出外搵食，但唔需要離婚，因為出外不是追求愛情，而係追求刺激也。靚太一怒之下，出外媾仔。一搵就搵到一位比老公更高大靚仔，更有錢，職業地位更高級嘅男士，老公見到之後，幾乎暈咗，驚到震騰騰……
呢類劇情，唔啱思想含蓄嘅女性嘅，睇唔明，好有道理。正如梁玳寧講四代女性之不同，非常精彩，啲太太睇到就驚。靚女K叫左丁山去睇焦媛、鄭文雅做舞台劇，焦媛跳脫衣舞，好有睇頭咁講。左丁山話：「且慢，有乜劇情先，睇吓我有冇代溝，焦媛裸體未必適合我。」靚女K話，劇情好簡單啫，焦媛係脫衣舞女郎，與訃聞記者同居，記者在影樓碰上攝影師鄭文雅，一見入迷，立即死追，鄭文雅同記者間中偷歡，藕斷絲連，但係與醫生歐錦棠結咗婚。後來醫生遇上焦媛跳脫衣舞，撻着火，於是兩對戀人，四角情仇，點搞呢？
左丁山聽到頭痛，問靚女K：「點樣作出嚟㗎，煽情啲噃！」靚女K話：「你果然OutOut哋，DVD都有得你睇啦，原創人係PartickMarber，憑此劇獲獎無數，橫掃英美，搬上銀幕，得到2004年金球獎，提名奧斯卡㖭，𠵱家係翻譯成為廣東話，原劇嘅性愛對白，用廣東話講，更加直接，何況出自靚女焦媛、鄭文雅之口！」
唉吔，咁又刺激得滯噃，似乎適合二十世紀九十年代與二十一世紀女性、男性、雙性。不如偷偷地去買套DVD（靚女K話電影叫做《Closer》）返屋企睇吓可唔可以接受先。靚女K話：「真奇，呢套劇嘅觀眾，女多於男，唔通香港男士除咗學業上輸畀女性之外（以升大學比例為準），喺社會觀念上，都零舍落後？唔怪得女人喺中環愈來愈有地位。」