睇完昨日的《林基車之罵戰》後真係無名火起，Chris竟在此批評我揀甚麼車做座駕，仲話載女仔多過載屋企人；係呀，我係鍾意用斯文到極嘅豐田Corolla做座駕、兼且唔鍾意將部車改呢樣改嗰樣，夠用就得喇！到底原裝車有咩唔好呢？雖然我部車的懸掛設定係以舒適為主，走像石澳道呢類迂迴曲折的山路時，真係會有左傾右側的情況，但如果車速不太高的話，掌握早一點扭軚入彎，根本就無Chris講得咁嚴重。仲有，我唔將部車大改特改，除咗因為袋中沒有那麼多錢外，重點係部車好多嘢都夠用，但仍要去改，到底有咩好處呢？我明白適量的改裝係可以增強車子的表現，但係咪要一出糧就將筆錢用晒去改裝呢？而且改裝唔多適合香港路面，好似石澳道咁，過咗鶴咀一段連續彎路，被維修得凹凸不平，高速駛過時，用硬避震會不斷跳彈，好易跳過對面線，往往要將車速收到好慢。我部原裝車就安全好多，一腳油就放開你部大改MX-5喇，呀，唔記得你賣咗車，𠵱家無車揸㖭，你有本事就唔好叫我接你返工呀。
記者：鄭達基