下世代嘅多媒體光碟格式究竟係HDDVD定係Blu-ray呢？現時兩方面都有大廠支持，可以話勢均力敵，主力提倡HDDVD嘅東芝，日前就喺日本搶先推出首部HDDVD影碟機，型號分別有HD-XA1同HD-A1兩款，雖然日本只限量推出1,000部，香港行貨更係遙遙無期，不過都有小量水貨機到港，今日就同大家實試幾部荷李活猛片嘅高清表現！
記者：許福合
攝影：陳盛臣
ImageGirl：Winnie
Blu-ray未有得玩住，所以HDDVD機一到港，已吸引住唔少玩家同AV舖嘅目光，個個等住一嘗高清影碟嘅魅力！華仁會家陣有Demo睇，好多原本去到想買DC或其他嘢嘅人士，都不禁駐足觀看高清影碟，情形比之前Demo高清電視更厲害。
玩高清要配LCDTV
現時用作示範嘅機種型號為HD-A1，外形睇落其實同一般影碟機無咩分別，只係機身厚咗些少。當放入HDDVD影碟時，就會自動啟動1,080i嘅播放畫面，事關1,080i原來已經係HDDVD基本影像輸出規格，所以有心購買嘅用家就要留意，先要檢查一下閣下電視是否支援HDMI介面，若果HDDVD改以色差輸出，就只能用到480i或480p質素，相信呢個絕非一般用家嘅原意！另外亦有專家指出，電視方面最好選擇支援1,920嘅電視，而擁有呢個規格暫時只有LCDTV可做到（唔計Panasonic將推出嘅103"Plasma），換言之要玩真正高清影碟，只有選擇LCDTV加HDMI插頭。
內裏構造似PC
東芝HDDVD機暫時推出HD-XA1同HD-A1兩款型號，由於貨量唔多，所以買家必須預訂。兩個型號功能大同小異，不過HD-XA1會加入4個DSP引擎來提高音效輸出質素，另外硬件方面亦會有所分別，網上就有日本發燒友將HD-XA1拆骨，發現結構同電腦差唔多，竟然係用上P4處理器、2GB記憶體！估計平價版HD-A1嘅硬件等級可能會稍為降低。
黑白色試高清威力
現時巿面尚欠缺HDDVD影碟供應，暫時只有3款HDDVD到港，不過日本方面已推出不少風景、靚女等試機碟，而香港亦有李克勤嘅HDDVD力撐，相信好快會陸續推出更多荷李活及港產正碟。
《歌聲魅影》：白色面具一樣細緻
《最後武士》：黑衣人分得清楚
《阿波羅13號》：片舊渣位多
入場費萬零蚊起
正所謂一闊三大，玩得高清，就要預咗家中影音大換血。首先最起碼要買部32"LCDTV再加一部HDDVD機，要求唔高萬零蚊已可執齊。不過要感受1,080i真正高清畫質，就必需一部1,920×1,080嘅高解像電視，SHARP部45"AQUA賣緊四萬零蚊，加埋高階版HDDVD機，埋單接近六萬，當然仲未計音響組合啦。在目前欠缺碟源底下，實在毋須急於換機，除非閣下係「鬆動派」掌門人啦！
Sales意見
Franky：更有立體感
同DVD比較，黑位更有層次感，而且顏色似乎更豐富，令整個畫面觀感好立體，同場與其他示範影片拍埋比較，仍然好突出。
阿達：期望更多HDDVD影碟
畫面質素絕對係無得彈，不過要配個靚電視，重要愈大愈好才有咁嘅水準，另外希望快啲出多啲HDDVD碟。
PROFILE
兼容光碟﹕CD、CD-R/RW、DVD-R/RW、HDDVD、DVD-RAM、DVD-Video
音頻DAC﹕24bit/192kHz
影像輸出﹕1,080i、720p、480p、480i
輸出端子﹕HDMI、色差、S-Video、RCA
售賣點：華仁會（23980280）
地址：旺角花園街75-77號花園商業大廈3樓
