爆機狂迷：街機網球Game王插卡養仔玩盡12至Top男球星

講到網球Game，《VirtuaTennis》喺全球Hit到開巷，頭兩集香港機迷都勁Buy，無他嘅，畫面靚動作細緻唔浮誇，一直都係蒲機舖嘅白領必修科目！唔知係咪要打呢班OL姐姐Market，新一集居然玩全男班球星上陣，全部Man得嚟亦夠靚仔，搭埋新加插卡培養球星玩法，滿足晒一眾貪靚仔嘅女玩家！
文：陳福榮　
攝影：林栢鈞　
ImageGirl：Tracy

《VT3》係SEGA班友仔養精蓄銳翻身之作，有咁多時間開發當然要撚到靚一靚，再加上佢係用《死人屋4》嗰塊超班底板Lindbergh嚟做，當然毋須質疑。但有一點頗為失望，就係日本原裝機台係用企身大機配16:9靚芒，𠵱家香港行貨係行海外單Game版本，因此裝落一般機舖度嘅「屋仔機」，就冇晒闊螢幕震撼效果。《VT3》同上集一樣重視簡單上手但技巧博大精深，咪以為1枝桿2粒掣就EasyJob，其實已經有唔少「搓」波方法，加埋推桿方向同角色能力特性，就做到好多種唔同變化出嚟，認真唔嘢少。

■每個場地都有不同特性，泥地和草地球速稍有不同。

■場外觀眾已不再是紙板人一大塊。

上集《VT》球手多到離晒譜，𠵱家總算收斂番啲，得番12個真實球星，包括有球王費達拿、魯迪克、拿度、納賓迪安、漢文、夏亞斯、比歷克、曉域、安季奇、丹特、費里路和古羅尚等。點解全部都係公嘅？仲諗住可以用𠵱家紅到發紫嘅舒拉寶娃㖭！估死佢都係留一手畀家用版啦，因為SEGA打晒鑼咁話《VT3》會出喺PS3喎，即管睇吓佢做唔做得成首發作品。另一方面，據說只要完成頭5版賽事，就會追加隱藏版同屈機大佬決勝負，呢個就真係原創人物喇！

■球王費達拿做得超像真，表情也捕捉得好。

■12名球手任君選擇，全部響噹噹。

呢個年頭打街機，用IC卡嚟儲資料已非稀奇事，《VT3》都嚟呢招算係順應潮流。開卡後可選擇一個角色嚟練，除咗記錄最基本嘅戰績同賺取金錢之外，仲會因應玩家嘅操作習性畀「餐士」你去改變角色特質！例如某球手本身擊球力唔強，但你又喺比賽中不斷狂抽波，久而久之電腦就會問你有冇興趣轉換球手特性，好似由FirstRunner變成PowerfulStroke之類，甚至係12個球手都冇嘅新增特性，變相強化能力。而且達成指定條件可以拎到徽章，如「首個MAX發球」、「第20個Ace球」、「第5局單打比賽」等，從而取得更換波衫之類嘅優惠。

■IC卡除可培育手下猛將外，仲可記錄戰績。

■開波前會顯示雙方戰績，似足《VF》及《鐵拳》。

如果大家有玩過家用機版本，就應該會對嗰啲練波賺錢印象深刻，事關唔少都係幾變態吓，搞到人幾乎想掉咗部機落街咁滯。𠵱家《VT3》嘅挑戰模式亦不遑多讓，要你喺極有限嘅時間入面做到指定動作，由最簡單「3個MAX發球」到比較困難嘅「必須正手贏波」等，唔少都好講求大家喺操作上嘅熟悉程度，假如技術麻麻都係勸大家玩番齋對電腦冇咁嬲。

阿三：冇寶娃唔緊要
比上集較似真正網球，因為平時打波邊有咁多上網㗎，呢種流程合理好多。冇女球星唔打緊，搞咁多嘢不如做好啲男球手好過啦，值8分！

Tracy：好似真實球賽
畫面都算好靚啦！平時我都唔多打機，但佢同睇電視嗰啲比賽真係好鬼似！啲電腦仲好鬼陰濕㖭，搞到我猛咁食蛋，挫敗感爆燈。

遊戲類型：SPT
對應機種：街機
遊玩人數：1至2人
開發商：SEGA
每局費用：$5（單打三局兩勝，對戰五局三勝）