看着車版猛將Dennis笑笑口，知道他又有新玩具，但估不到他竟花上$3,200買了兩部像真度十分高的巴士模型回來。拍照時，我細聲問他：「你怕給媽媽知道，又不可以放在家中觀賞，其實你有沒有後悔？」「有，不過巴士模型的二手市場很好，賣$3,000也有人要。」原來這些模型不但好睇，二手價值亦頗高呢，以下是Dennis對巴士模型的自述：
我是一個「上了年紀」的巴士迷，普通的1:76巴士模型已不能滿足我的要求，所以早前一次過用咗$3,200，買咗兩部1:24的中巴和城巴「倫敦寶」模型，部車手工精細得很，望落去好似成部真車咁，連一班同事都話正斗。
記者：鄭達基、伍旋卓 攝影：周旭文
和真車99％相似
兩部車未正式到手前，我心裏面成日諗，部車價錢足足係普通模型嘅4倍，如果手工唔好咪出事？哈，好在佢哋嘅手工一啲都唔差。其中最神似係中巴嗰部，和真車99%相似，除咗用嘅車身顏色和車身貼紙跟真車一模一樣外，最緊要係可絞動的路線牌有我最愛的5B和10號線，絞來絞去都不知幾好玩，車入面連司機、引擎和波箱都有埋，問你怕未？
絕版深圳城巴
至於深圳城巴，真車一樣係絕版，我最鍾意係部車啲水撥和扶手都係閃閃生輝，好似電鍍咁，型呢？跟住絞吓個路線牌，發現到有當年城巴來往香港至深圳的500號線，還有車身跟路線牌也有當年城巴的Logo和電話號碼，夠晒Classic。好，等我得閒研究吓點樣拆開部車，放啲人仔入去扮乘客先得。