長假期前夕，大市果然一如所料悶到飛起，但總算有一場好戲上演，就係股壇長毛大戰超級散戶，場面相當精采。
涉及的股票，就係早排公布業績盈利勁跌92％的新確科技（1063），話說隻股有兩位股東揸住唔少貨，其中一個係剛剛成功連任港交所（388）董事的股壇長毛，以及一位超級散戶。
新確早排公布勁差業績，翌日股價即急跌43％，其後聯交所資料顯示，原來超級散戶在市場沽咗3％貨，持股量降到13％以下，而新確股價亦一度插至最低的0.68元。但最近聯交所資料顯示，股壇長毛人棄我取，在市場增持新確，令持股量增至5％以上。
受到股壇長毛增持消息刺激，新確昨日勁升29.58％，收0.92元，成交股數1981萬股，金額1700萬元，並唔係亁升。小初心諗，如果兩位繼續大鬥法，隻股真係搵你買咯。
慕容小初