平安包師傅郭錦全今年再次包辦高50呎、掛起8,500個平安包嘅包山，佢話︰「濕濕碎啦！」
郭師傅喺長洲土生土長，已經有30幾年整包經驗，真係眯埋眼都識做，今次8,500個包，只用咗兩日就可以起貨，速度快得驚人：「𠵱家做包人手足夠，可以好快起貨。」
啱啱出爐皮光肉滑
平安包以麵粉做皮，餡料有豆沙、蓮茸、麻茸等，蓋上鮮紅色「平安」字樣嘅平安包，適逢近來食住太平清醮同搶包山嘅氣氛，餅店1日可以賣幾千個，認真厲害！啱啱出爐嘅平安包至好食，摸上手皮光肉滑，入口軟綿，我推介豆沙餡，紅豆香得唔膩，女仔食1個都唔會滯。
郭錦記餅店（29869717）
長洲北社街46號舖
