一個經已退下火線，另一個仍樂於趕科場。雖則二人路線唔同，但就雙雙被友邦保險睇中，邀請入局做獨立非執行董事，難得佢兩個又答應噃。
友邦話，都用咗唔少時間，先冧掂佢兩個，仲話任期不設上限，想做幾耐都得，隨佢哋鍾意囉，但就死都唔肯講，兩人會收幾多董事袍金！
講開阿松，佢辭官之後，專注陪妻湊女，一心做小母牛義工，份人確係低調咗好多，之不過成日都仲有傳言，話佢會重出江湖，係真係假華華唔敢妄言，不過嚴格嚟講佢都未完全退出江湖，間中都有做吓幕後紅娘。但佢當年偷步買車嘅事，就時不時俾人摷番出嚟講。
好似噚日《大公報》又將佢呢件事擺上枱，話說好多人覺得審計署挑剔港台，咁《大公報》就將阿松呢件事攞出嚟相提並論。
佢哋話當年阿松偷步買車，以佢當時嘅年薪嚟講，慳得嗰19萬元稅，都只不過係一個小數目啫，點解今日又雙重標準呢，總之大錯又好，小錯都好，錯就係錯，點解唔批得……唉！乜當年《大公報》唔係力挺阿松咩，點解今日會咁講嘅？
李華華
讀者如有任何意見或報料，歡迎發送電郵至[email protected]。