呢排香港人嘅另一恐慌係邊緣化，咁噚日國家嘅司長級人馬范恒山落到嚟香港，就順便解畫、安撫兼醒下呢班港燦。
呢位范司長頭銜好鬼長，係國家發展和改革委員會經濟體制綜合改革司司長，佢噚日應香港新聞行政人員協會嘅邀請出席午餐會，講吓十一．五規劃對香港嘅影響。不過好奇怪，雖然主辦機構係同行，但啲新聞界高層就唔畀記者入去採訪，要嘉賓會後喺場外再簡述一次。
范司長話，香港唔需要擔心被邊緣化，理由有4大個：1.香港有法治、人才、訊息和管理嘅優勢，內地有排未追得上；2.兩地可以相互推動發展，例如國內旅客訪港正大力推動本港旅遊業；3.中國經濟發展嘅蛋糕愈做愈大，並唔係此消彼長；4.十一．五規劃支持香港發展金融、物流、旅遊等產業發展，加上CEPA嘅安排，將會促進香港繁榮穩定。
不過佢亦補充咗一句，話喺新形勢、經濟一體化之下，港人亦要調整自己，改變吓思維觀念，佢以內地城市人為例，以前佢哋要求對企業全權管轄，認為咁先算對自己有利，但𠵱家已逐步調整為「不求所有，但求所在」，甚至於「不求所在，但求有利」。港人要細細玩味呢句話。