你可能會覺得睇世界盃同買梳化毫無關係，但唔好唔記得，睇世界盃同長期抗戰無分別，日日要你坐住屋企嗰張無晒彈力又向下墮嘅梳化，食同瞓都喺嗰度，過完決賽周，包你條腰同頸一齊報銷，所以話，想睇得舒舒服服，梳化係最重要嘅作戰元素之一。啱啱有一張高智能梳化面世，會行會走仲可以遷就你嘅高度慢慢升起，幫你由梳化度企起身，照顧咁周到，就算真係坐到腳痹都唔怕啦！
記者：黃婉冰
攝影：何家亮
Model：Vicki
功能梳化 變身話咁快
如果打算晚晚馬拉松式咁黐住張梳化睇世界盃的話，一張舒服又具備其他功能嘅單座位梳化就絕不可少。驚睇睇吓睡魔急call，單座位梳化床就最啱，打算坐成晚觀戰，揀張可以變成躺椅嘅設計會啱啲，再唔係索性豪啲，買張行得走得又可以變成舒適躺椅嘅高智能梳化，咁就可以成晚「Pat」不離椅咁由開場歎到收場！（以下尺寸單位為cm）
會升會行 照顧周到
由德國名廠Himolla出品的智能梳化-FX10，最特別是它可以自動以貼近人體的角度緩緩升高，俾你可輕易由梳化上起身。開啟開關掣，再按動附設在扶手的操控桿，梳化底的轆便會滾動而自動行走，24V電，叉足10小時可行走4公里，啱晒懶人同老人家。
椅背和腳踏可作不同角度電動調校，話晒都係高智能，製作繁複，想買就要預訂，而且數量有限，要買快手。
$58,000（a）
尺寸：79（w）×88（d）×105（h）
有埋按摩功能
全真皮按摩梳化，有搥揼、推背、按腳等多種按摩模式，亦可自選按摩速度和長短時間，另有電腦記憶功能、電動調校椅背和腳墊角度，椅側可放雜誌。
$27,200（a）
尺寸：92（w）×92（d）×112（h）
電腦遙控操作
意大利NATUZZI全真皮全自動彈腳梳化，椅旁連接有遙控操作，一按掣，椅背就會慢慢向後移，腳墊亦會自動調校慢慢伸出，可根據個人需要調校出不同角度，操作方便。
$15,800（a）
尺寸：97（w）×88（d）×91（h）
設計纖巧夠慳位
這張德國出品名為SIXX的真皮單座位梳化，設計流線而纖巧，椅背可搖動調校角度。調校好椅背角度，再將椅側的波棍形安全鎖一拉，可固定椅背角度，所需空間唔使太多，夠晒慳位。
$19,380（a）
尺寸：69（w）×82（d）×104（h）
防污布料易打理
NYBODA活動單座位梳化，用背脊輕輕向後挨，椅背就可做出不同角度，腳墊亦隨着彈出，即變成一張躺椅。仿麖皮布料經過防污處理，就算倒瀉飲品都易於清理。
$2,690（d）
尺寸：85（w）×94（d）×95（h）
一拉即變日式單人床
單人日式梳化椅，椅背可調校出不同傾斜角度，只要把梳化托高再拉出，即變成單人床，布套和床褥可分開購買，鍾意點襯都得，布套可拆洗，易於打理。
$399（d）
尺寸：70（w）×110（d）×80（h）
可拆頭枕適合不同需要
全真皮電動彈腳梳化，全電動操控，一按旁邊的按鈕，就可控制椅背的角度，腳墊亦會同時慢慢伸出，頭枕可輕易拆除，適合不同需要。
$12,980（a）
尺寸：102（w）×91（d）×99（h）
玩味梳化 潮屋必備
無錯，買梳化最緊要係坐得舒服，但有內涵無樣一樣唔掂，尤其是身處呢個講design嘅年代，潮人之家又點可以無一張「designersofa」？我都知由於時間關係，你未必有時間慢慢揀，以下已為各潮街坊挑選咗幾款心水推介，不妨睇啱先再買！（以下尺寸單位為cm）
Cute版「人大」梳化
人大豆豆梳化，顧名思義，靈感嚟自60年代毛主席開人大會議坐住嗰張梳化，咪睇佢外型又肥又矮，查實坐落都幾鬼舒服，備有淺啡、淺灰、深灰等顏色。
$790（b）
尺寸：61（w）×61（d）×33（h）cm
名師潮玩象腳設計
由MarcelWanders設計，出品自荷蘭名牌moooi，看似大象腿的椅腳是designer的獨特概念，椅腳下藏有4個活輪，活動自如。
$12,000（e）
尺寸：78（w）×62（d）×53（h）
馬毛梳化夠晒Raw
名為PONY的梳化，全張椅套均用上軟滑黑色真馬毛製造，本身帶光澤的馬毛令梳化看起來更有層次感，簡單線條，摩登家居之選。
$4,999（c）
尺寸：85（w）×83（d）×66（h）
牛皮梳化又軟又滑
這張Loft以實木椅框襯上牛皮，牛皮上面再綴以仿動物毛的設計，效果同馬毛梳化差不多，款式比較classic。
$7,599（c）
尺寸：85（w）×83（d）×70（h）
特高椅背任你挨
SPARROW仿麖皮高背梳化，採用一種近似麖皮的麖布質料，易於打理又夠軟熟，夏天坐都唔怕熱，特高椅背設計可以讓頭部挨得更加舒服。
$2,300（b）
尺寸：60（w）×83（d）×132（h）
尾轆設計四圍碌
SUPREME真皮單座位梳化，梳化腳後裝有兩個小「尾轆」，鍾意碌去邊都得。真皮咕𠱸同椅背二合一，唔怕坐坐下個咕𠱸跣走。
$4,380（b）
尺寸：80（w）×83（d）×86（h）
SHOPLIST：
（a）歐化傢俬：太古城中心第2期1樓104號舖25678370
（b）G.O.D：銅鑼灣霎東街禮頓中心28905555
（c）Hamptons：中環中半山堅道61號宜昌樓地庫28698018
（d）宜家：銅鑼灣告士打道310號柏寧酒店地庫31250888
（e）DesignLink：灣仔聖佛蘭士街11號地下31138728