「做齋菜開唔到連鎖店㗎！」就係因為朋友呢句，激發呢對襟兄弟開分店！
我對齋菜無乜好感，一個下午就已經要改觀。
唔明白旺角花園街總店點解成日都咁旺，原來兩兄弟將齋菜西化，最吸引嘅係每3、4日轉一次菜式，誠意十足。
適逢今日佛誕，再講，以下餸菜，隨時可一不可再……
至今仍回味那碟蜜汁羊柳。
記者︰方綺君
攝影︰黃子偉
熟客等位發老脾
位於花園街的總店一早做到街知巷聞，不過亦由於太出名，每日慕名來幫襯嘅客人太多，經常逼爆小小舖位，連帶得失不少經常等位等到發老脾嘅熟客。
禾之家老闆和仔同李先生𢱑到頭都爆，諗緊擴充現有舖位抑或開分店之際，一位飲食業資深嘅朋友講咗句︰「做齋菜開唔到連鎖店㗎！」和仔同李生不嬲唔信邪，決定偏要開分店，𠵱家搞到間舖有聲有色，朋友們都大跌眼鏡。
「厭咗做意大利菜」
原來和仔之前做開蔬菜批發，包辦齋菜生意；拍檔李先生本身亦從事飲食業，開意大利餐館，係禾之家嘅熟客仔之一。或者係李生已經厭倦做意菜，又或者係和仔要搵個生意拍檔，一次傾傾吓偈話：「其實我覺得齋菜可以做到西式化，多啲款式，唔係來來去去嗰幾味嘅！」「係呀係呀！我都覺喎！」就係咁，一次神推鬼差，大家一拍即合打天下。
「禾之家」4大規條
唔好睇佢兩個好兄弟乜都無所謂，佢哋自創咗4大規條，都咪話唔認真：
1.各有各做
意思唔係兩兄弟各有各做，而係新店同花園街總店都要各有特色，每3至4日就會創出新菜式，滿足食客。
2.唔會貪平換貨源
和仔大大話話做咗18年蔬菜批發，貨源嚟自乜地方佢最清楚︰「我哋唔會賣毒菜！」而且全部食物亦經過無動物基因測試。
3.浸菜要足半個鐘
跟足食環署指示，蔬菜用水浸30分鐘，再用鹽水洗刷。
4.只用橄欖油
係乜原因唔使多講喇啩？
西式齋菜有誠意
跟足4大規條都唔係易，淨係第一條各有各做都做死人，但又只可以咁樣做先可以畀到新鮮感食客，亦可以吸納唔同客源，打破朋友話︰「做齋菜開唔到連鎖店」嘅命運。新店菜式加入了西式元素，賣相西化，味道亦趨多元化，餐牌已有過百款食品，還會經常轉換新菜式，我睇到張餐牌，同坊間一般素食餐廳比較，真係用心好多，感受到嗰份誠意。
記者必揀
蜜汁羊柳 $48
扮肉高手猴頭菇今次化身羊柳，做法先將「羊柳」、青椒、紅椒、西蘭花煎香後再焗，淋上素牛柳汁，香氣撲鼻。
金槍魚沙律$48
大豆纖維做出金槍魚肉的口感，紫菜做魚皮，外層鋪麵包糠炸，卜卜脆好香口，食落同真魚無分別。
其他正菜
a.有機雜菜沙律 $28
有機蔬菜全來自外國，特別清新翠綠，配師傅自製沙律醬，爽口。
b.紅芥黃花枝片 $52
素魷魚用紅咖喱，芥末粉做汁炒，做出少許攻鼻的效果但並不辣，汁料食落口感厚身，甜得入味。
c.比利汁蔬菜批 $42
蔬菜批是由粟米、甘笋、金菇和拉麵條，混和少許粉漿，用油煎。淋上由橙汁、番茄汁和師傅秘製醬汁，出面食唔到。
d.石板豆腐 $42
竹笙包日本滑豆腐，新鮮南瓜片配菠菜汁，色澤鮮艷，入口淡淡菠菜味。
e.柏子仁七色菜 $48
柏子仁有安神定經功效，略爆香後放入7種不同的蔬菜一齊炒。政府話1日要食3隻顏色蔬果，咁食法一定夠啦！
食客幾句
禾之家素食（27712393）
油麻地白加士街131-135號地下
（佐敦地鐵站A出口）
