發展商趁黃金周高價推盤仍有佳績，個樓市似乎生猛番啲，點知突然殺出個五星級減價貨尾盤搶客，搞到後市突然間冇晒方向；本來諗住借勢開盤嘅地產商，唔多唔少打窒道氣。不過手持超高價豪宅嘅發展商一於少理，反正人哋點樣宣傳自命係豪宅都好，淨講地區形象已經輸九條街。
西半山樓勝在地利
南豐嘅西半山羅便臣道80號，一直hold住唔少優質單位收租，見真正豪宅仍有需求，啱啱就攞咗8個複式出嚟賣，意向呎價1.3萬至1.5萬；比當年樓花期嘅1.5萬至1.7萬「你」想價，平咗超過一成。
今次由中原獨挑大樑負責銷售，西半山助理營業董事李巍話，當年南豐只係掟出個意向呎價，唔算正式開售，加上部份留番收租，今次可謂「首度」出售。
個盤外觀設計都幾時髦，同中半山頂級豪宅有得揮，加上地利佳，附近唔係公園就係學校，高樓大廈相對較少，維港海景視野無遮擋，吸引唔少名人入住。
電郵地址：[email protected]