市底好穩，恒指跌過60點後，尾市又有掃貨鏡頭，埋單只係唔見13點。
恒指成份股升得最多嘅係德昌（179），但亦只係進賬1.6%。公司早前發出盈警，金屬價錢咁高，業績唔得不利股價，正股買唔過，相關C輪更加賭唔過。昨日德昌C輪9917升38%，收4仙，7月初到期，行使價8.30元（正股做緊6.50元）。去到尾，隻輪唔作廢先至出奇。
華能C輪9853：華能（902）近排硬淨，昨再升5仙，收5.75元。陰陰跌，跌足兩年，市場追吓落後好正常。華能C輪9477大升115%，收5.6仙，做咗是日輪王。隻輪本月22日最後買賣，行使價6.06元。華能係移動緩慢股份，唔係咁易喺隻輪到期前上番6.06元以上，隻輪最後都係飲雪水居多。9853實際好多，下月尾夠鐘，輪價22.9仙，溢價1.4%，槓桿率25.1倍（有效12.2倍），引伸波幅29.6%。賭華能C輪，賭呢隻。
中國海外C輪3662：中國海外（688）升0.55元或5.7%，C輪3662砰砰聲由57仙彈上78仙，升幅37%。隻輪10月杪到期，溢價13.2%，槓桿率7.1倍（有效4.2倍），引伸波幅49.6%。咁嘅數據，買落去輸嘅機會大過贏。咁有冇其他C輪諗得過？答案係冇。
滙控P輪9323：滙控（005）跌1格，P輪9323大升28%。隻輪8月初到期，正股要跌到126.80以下，揸隻輪先至有得剩。睇情形，隻輪好難有得剩。滙控P輪，計落冇隻買得過。
章盛