喺外資基金大手吸納，同炒家炒賣推動下，工廈回報拾級而下，有6、7厘已算理想，假如有1分（10厘）即屬吸引水平。火炭剛啱就有宗──華耀工業中心中層全層，連兩個車位，16178方呎，交吉以約971萬售出，呎價600蚊。美聯工商部分行高級營業經理范明珊話呢幢工廈有雲石大堂同貨台，屬優質盤源，呎租5.5到6蚊，計落回報有11至12厘，睇怕仲有上升水位。
佢話早前同區豐利工業中心中層，同威力工業中心高層單位，分別以206萬同179萬成交，以市值租金計，同樣有1分回報。
講開工廈，利嘉閣測量師行工商部經理朱亮恒報料，話荃灣榮興工業大廈高層16室，1386方呎，炒家喺4月下旬用82萬買入，剛以88萬摸出，呎價635蚊，唔夠1個月賺咗6萬蚊，升值7.3%。佢仲話上個月荃灣共有63宗工廈買賣登記，摸貨佔咗12宗，都咪話炒風唔熾熱。