為咗成為基金愛股，近年大劉（劉鑾雄）旗下嘅華置，好高調咁提高公司管治水平，噚日華置出咗最新年報，除咗同其他上市公司睇齊，列明各董事攞幾多人工外，重特別講明：為加強獨立性、問責性同責任感，主席同行政總裁會由唔同人擔任。
心水清嘅讀者都記得，前排一直做華置執行董事嘅大劉，突然多咗個行政總裁職銜，至於佢細佬──細劉（劉鑾鴻）就繼續做華置主席。
據年報解釋，做行政總裁嘅大劉，主要工作係管理集團業務；至於做主席嘅細劉，責任只係確保董事會正常運作，同埋遵守良好企業管治常規同程序。
邊個係華置真正揸fit人已經好明顯，所以大劉攞嗰份人工高過細劉，舊年薪酬連其他酬金，大劉收360萬元，細劉只收240萬元。
兄弟同心
不過，前排大劉猛咁喺市場買華置，當時佢解釋係因為有基金要貨，自己手貨又唔沽得，於是叫細佬賣咗手上嘅華置畀班fund佬，細劉咁有義氣，點可以待薄。
所以細劉喺自己揸fit嘅利福國際，支取嘅酬金總額有263萬元，大劉就只係攞5萬蚊董事袍金，兩份「糧」加埋，細劉仲多過大劉138萬元。不過，「兄弟同心，其利斷金」，冇計啦。