孫柏文喺98年扮過編劇，用隻金手指寫過劇本，可惜冇劇團賞識，劇本就咁擺埋一邊。不過，噚日喺公仔箱，我睇見金管局總裁任志剛同立法會議員嘅唇槍舌劍，特別係睇到任總講今日特區嘅按揭制度嗰時，我就諗起嗰份劇本，以下就係劇本其中一段，希望有電影老闆，睇完之後叫我拍成電影。
背景：1991年某個政府會議
番鬼佬殖民地高官A：你有冇睇見通脹率？雙位數字，完全失控咁，我哋唔係有聯繫滙率咩？點解美金嘅通脹率低我哋咁多？
番鬼佬殖民地高官B：好容易出入口嘅貨物，我哋都係跟住美金嘅通脹率，總體通脹率咁高嘅原因係啲容易出入口嘅服務。咁服務性行業，就係非常之人力密集，所以啲服務貴咗，都只不過代表我哋啲工人嘅人工高咗。係好事！其實，應該驚嘅並唔係貨物同服務嘅通脹率，而係上咗好多嘅資產價錢，特別係樓價。
A：你驚啲本地人買唔到樓？
B：本地人買唔買到樓，關我哋乜事？我哋嘅底線，只係要啲本地人唔好好似以前咁，通山起木屋。如果樓價只係有升冇跌我都冇乜嘢驚，我驚嘅係樓價因基本經濟理由上升，不過又因啲政治前景飄忽下跌，會影響金融界穩定性，繼而影響我哋殖民政府管治嘅穩定
殺置業夢保銀行家政策
A：有乜解決辦法先？
B：我哋可以要求銀行推高買樓首期嘅百分比，由𠵱家嘅一成推高到三成，等銀行抵抗樓市跌嘅能力升高。樓市如果真係大規模咁跌，都係死啲買家先。
A：你估仲係以前，我哋可以點樣做都得，𠵱家每個政策都講民意，邊度會有人支持呢個政策。三成首期會扼殺好多人置業嘅夢想，仲要係為咗保護啲大把錢嘅銀行家，嘩，好難推銷呢個政策喎。你諗住點樣推銷呢個殺置業夢、保銀行家嘅政策？
B：我哋可以講真話，希望啲人會明白……
A：哈、哈、哈！唔好講笑啦！
B：咁買樓除咗有人想一圓置業夢之外，仲有另一批人。
A：係喎，雖然呢度人人都想炒樓，不過人人都唔鍾意啲炒家。輿論分分鐘會話我哋出手打擊炒樓唔夠狠。條橋好勁！不過，如果我哋同人講話推行任何政策，目的係去打擊炒樓同樓價，咁即係話政府承擔咗支配樓價嘅責任，我驚市民到時會好理性咁，要求政府打擊樓價。
B：冇錯，呢個政策推出之後，市民係應該有政府會支配樓價嘅預期。不過，第一，只要樓價跌少過三成，就唔會有負資產，第二，我相信我哋或者啲繼任人，都唔會咁蠢相信政府要承擔支配樓價嘅責任，去打擊樓價嘅！
孫柏文