對於好多香港人嚟講，今個禮拜焦點除咗有2日紅假之外，必定係長洲太平清醮。由上禮拜開始已經陸續有逾萬人湧入長洲，睇搶包山選拔賽、攀爬同樂嘉年華以至飄色巡遊等。只可惜，一班嗜肉嘅年輕人就要付上食齋嘅代價。慘喇！冇肉食嘅壯男一定腳軟㗎！唔想咁？幫襯偷雞賣肉嘅食店囉！
記者：許維雅
攝影：黃子偉
起醮3日禁肉守齋
為入長洲睇熱鬧，不少人不惜山長水遠捱貴船費走入長洲，但有好多非長洲居民都可能未必知道，起醮期間必須禁肉。根據長洲多年來嘅太平清醮習俗，居民必須在起醮後3日內禁肉守齋，目的係避免殺生，為整個長洲祈福。據村民所講，長洲值理會在一星期前曾派發單張勸阻食肆賣肉、魚蝦蟹同奶類食品，昔日若發現有食肆破戒賣肉，不但受村民指摘，值理會更會派出工作人員上門丟肉。點解咁嚴謹？村民指，曾經有某總理嘅女兒在守齋期間破戒食肉，結果那年長洲就掛起10號風球，所以呢啲嘢真係唔可以唔信邪，尤其對長洲的水上人家而言更加要嚴守規矩。所以今時今日齋戒期間舖頭一旦賣肉壓力亦好大，皆因長洲平平安安猶自可，有咩風吹草動，哼！實賴你！
破禁賣肉有因由
講就咁講啫，但如果叫𠵱家嘅年輕人守齋，真係冇乜可能喎！長洲鄉事委員會主席翁先生就企到硬：「入得嚟就要入鄉隨俗！」不過呢份堅持，早排就引起基督徒關注其宗教自由問題，而且好多人亦覺得呢幾日食乜都好似冇咗自由選擇權咁。所以，唔少舖頭眼見整個長洲全年最旺嘅時間就係呢幾日，淨係賣齋賺得幾多吖，為咗做生意賺多啲，愈嚟愈多食肆偷雞破禁賣肉。
喺起醮禁肉的第一日，記者巡視過長洲部份舖頭，大型海鮮檔不嬲做開遊客生意，梗係睬你都儍；細細間茶餐廳咩，乾炒牛河？火腿通粉？平日餐牌有乜賣乜！點解你哋咁搏呀？部份不願上鏡的店主就話：「年年太平清醮又搞包山、又搞飄色，啲會社使唔少錢！啲錢邊度嚟呀？咪逐檔逐檔拍門半逼半勸叫我哋募捐囉，都未開始賺錢收入已經跌咁一半，你話唔賣肉做生意點冚得番條數吖！」哦，原來咁解。
原居民點睇？
開光包可辟邪
講到食齋，呢隻平安包就算幾難食都有好多人搶住食。郭錦記餅店因為負責幫康文署製作包山上嘅平安包，所以呢幾日生意滔滔，問佢一日賣幾個？佢自己話多到數唔切。
不過喺今晚半夜12點的祭神儀式之後，呢啲開過光嘅平安包先至真正值錢。因為3棟包山上的包都會分派畀長洲居民（就算搶包山踩過嗰啲都照派），通常每人都會獲發4個。而長洲老一輩嘅居民（特別係水上人）都十分重視，覺得開過光嘅平安包有辟邪作用。雖然放咗幾日已經好難食，但部份居民仍會食落肚祈求身體健康。其他居民就會放喺屋企保平安，有啲人放一個禮拜，有啲人放成年都有，到出年再換個新嘅，當正護身符咁辦。
平安包變種搶錢
政府為疏導人潮，今年特別將飄色巡遊分2日舉行。不少商店為增加收入，由上個禮拜已經開始售賣平安包紀念品，款式各不同，大至咕𠱸、細至匙扣乜都有，間間都話自己限量幾千，有買趁手。
包山嘉年華2006
5月2-9日 7:30pm至11:00pm演戲助興（北帝康樂廣場）
5月2日 11:00pm至5月5日午夜0:00齋戒
5月5日
10:30am功夫表演（北帝康樂廣場）
11:30am麒麟表演
2:00pm至4:00pm第一天飄色會景巡遊（北社街至天后廟，再折返北帝康樂廣場足球場）
午夜0:00搶包山（北帝康樂廣場對出足球場）
5月6日
9:00am分發平安包（北帝康樂廣場）
2:00pm第二天飄色會景巡遊（北社街至天后廟再折返北康樂廣場）
查詢：康文署網址
http://www.lcsd.gov.hk/specials/bun/b5/index.php
