當父母，原來真係唔簡單。出世前求神拜佛BB要健全齊整，出世後驚佢病之餘，仲擔心埋點解咁大個仔淨係識叫波波未識叫爸爸媽媽。到讀書喇，當小朋友幼稚園都未畢業，阿媽已經為咗幫阿仔揀小學而煩到爆炸！統一自行分配學位計劃要靠區域、靠運氣，自己去直資、私校面試就不求人，所以好多父母為咗幫仔仔囡囡入名校，參加定小學面試攻略班。呢類攻略班為期3個月左右，諗住嚟緊9月面試嘅，𠵱家係報名嘅最後時機喇！
記者：馬慶武
攝影：黃子偉
Model：Boris、Muffy
訓練小朋友不怯場
喺3月舉行過小一入學講座嘅ChurchillChamber，係專門為3至12歲小朋友而設嘅教育機構，近年都會舉辦小一入學面試班，雖然係針對面試嘅課程，但其實絕對唔係會考天王嗰隻，老師唔會幫小朋友貼題目，更加唔會要小朋友背答案。首先在未開始課程前，導師會詢問父母希望子女入讀的目標小學，再從經濟、子女能力先分析入學的機會，如性格比較好動嘅就唔啱入讀傳統、只着重測驗考試嘅名校，目標應該係採取活動教學嘅學校。經過分析之後再為父母定下3間志願小學之後，開始嘅課程包括強化小朋友嘅語文能力、表達能力及創意，唔會坐定定好似返學咁，會透過講古仔學英文、用畫畫發掘小朋友創意，模擬面試只佔小部份，最重要係令小朋友面對陌生人時唔會怯場。老實講，小朋友唔會覺得辛苦，玩玩吓又上一堂，不過家長就要畀$5,000學費上12堂，貴？𠵱家報名都要排WaitingList呀！
一條龍學校最受歡迎
嚟得讀面試課程嘅，都係想入名校。同好幾個媽媽做過訪問，有啲想揀名校，有啲畀子女自由發展，但大家都有一個希望，就係子女可以入讀一條龍式嘅學校，即係小學畢業後直升附屬中學如拔萃男書院附屬小學，唔使升中又煩多次搵學校之餘，子女仲更容易適應中學生活，一舉幾得。
精英入學面試訓練課程
時間：每星期1課，每次1小時
費用：$5,000（12課）
查詢：ChurchillChamber
（23753882/www.churchillchamber.com）
答案要具創意
面試貼士、資料嘅來源有部份嚟自學校，另外大部份則係集合家長們面試之後嘅經驗之談而成。「經過分析後，小朋友成功入讀3間志願學校的機率達90%以上。」ChurchillChamber課程總監Annie仲話課程多以小組形式進行，會教導小朋友禮貌、應對、和別人相處及處理問題嘅技巧，例如要答得有創意，即除正確答案外還要加以補充自己嘅觀察所得，遇到唔識答嘅問題亦唔可以只答：「唔知。」以下就係一啲大人細路都應該識嘅面試貼士，大戰前夕絕對要做好準備。
醒目仔答案案例
問：香港特首係邊位？
正確答案：唔知佢個名，但我喺新聞見過佢，戴眼鏡，打煲呔嘅。
失分答案：對唔住，我唔知！
問：咩嘢會反映到你自己？
正確答案：我自己嘅相片、或者我個影。
失分答案：鏡！
問：如果喺街唔見咗媽媽，點算？
正確答案：我會搵警察叔叔幫手。
失分答案：搵爸爸囉。
問：你爸爸做咩㗎？
正確答案：（如實作答，可多加形容。）
失分答案：佢跑馬㗎！佢成日睇電視跑馬㗎！
自學面試策略
唔想話迫啲小朋友去面試班但又想試吓考名校嘅，最啱就買番本小學攻略自修一下。當中有介紹港九各學校課程、環境、課外活動嘅書，有心投考就應該做定功課；亦有以IQ題為主嘅面試貼題天書，貼唔中咪當學多樣嘢囉；部份仲有全港學校網分布List㖭。
JP@apm
（觀塘創紀之城5期apm1樓L1-21舖/31481089）
最重要量力而為
香港輔導教師協會副主席趙榮德：「如果喺屋企模擬吓面試，訓練子女咁都OK，但係如果為面試參加課程就誇張咗啲。我覺得唔一定要入名校，但名校係有名校嘅好處，可能教學全面啲，學生嘅成績德行好啲，至少地方都大啲，學生多啲活動空間。不過最緊要唔好畀壓力小朋友，做家長嘅要量力而為，仲有唔好覺得咁辛苦畀咗小朋友入名校，大個咗佢就要報答你，要保持心理平衡。同埋我肯定面試無得貼題目，即係好似足球比賽咁，報紙夠話曼聯贏兩球，噚晚咪0比0打和。」
父母貼士
1.面試前先了解學校的教學方針，要表達自己樂意與學校合作。
2.想想自己管教子女時有甚麼特別的方法，如何解決問題。
3.無論子女面試時的表現好與壞，都應該以微笑鼓勵。
4.應與子女一同製作面試用的履歷表，履歷表格式應以精簡為主，但同時亦要盡量寫出子女強項及過人之處。
小朋友貼士
1.要給別人好印象，最重要有禮貌，第一件事係入面試室前要敲門。
2.到達學校範圍不應拖着父母，亦不可有過份依賴父母的表現。
3.不可有太多無謂小動作。
4.要保持笑容，不應表現出驚恐、呆滯表情。
衣着貼士
髮型：不要過份「老積」，簡單清爽最好。女仔亦毋須化妝。
衫：不要穿背心，簡單便可。
褲：為咗表示尊重，最好不要穿短褲；女仔最好着裙。
鞋：皮鞋、波鞋也可，唔好着拖鞋，行路會發出聲音嘅亦不適宜。
名校面試方式
聖保羅男女小學
分為集體面試及個人面試，很多面試者的兄姐是該校的學生或舊生，但這未必會帶來優勢。
高主教書院小學部
同樣有小組及個人面試，校方會分別用普通話及英語和學生交談。
聖保羅書院小學
學生需要單獨進行面試，家長可在面試室外看到整個過程。
港大同學會小學
學生面試主要分為3部份，分別以普通話、英語及廣東話進行。
德望小學
對學生的成績要求最為嚴格，可能會要求學生透過繪畫來說明家庭狀況。
拔萃女小學
要求學生語文能力及表達能力高，表現要求穩重，愛看書的學生較有優勢。
拔萃男書院附屬小學
由3人小組會見學生及家長，重視學生的表達能力及語文能力。
保良局陳守仁小學
校內約3成學生屬亞洲其他區的學生，所以面試會以英語進行。
九龍塘宣道小學
重視學生的音樂才華，對學生學術成績要求亦嚴格。
媽咪心聲
Annie：「當父母嘅當然希望子女入名校，但都要分析過小朋友嘅性格同能力先。」