女人街：$18萬老母變靚太

$180,000，大拿拿$18萬你會點用？畀首期？買股票？去澳門盡地一鋪？不如帶媽媽去宿營啦！可能你會問，宿營使唔使$18萬呀？其實正確應該為$188,888，到洲際酒店新開嘅總統套房過一個最豪嘅母親節，cheap啲嘅花幾千蚊坐直升機吖？人一世物一世媽媽得一個，無計啦！

記者：黃若茵　攝影：伍慶泉、陳盛臣、楊錦文
模特兒：Bessie&Joseph（StarzPeople）、方頌茹、陳太、Lin（Salvador）、Polly（PureModels）　
化妝及髮型：Xavier（MaeVon）

7,000呎套房　有私人管家

露天泳池、健身房、浸浴、寬闊的夜空景色、垂涎美食，全部可在此7,000呎的私人空間找到，洲際酒店於母親節推出2日1夜總統套房package，可跟最多10位家庭成員一起度過。媽媽可於這2天內盡情享受，更有專人設計造型扮靚，2天共6餐的美食都由專人為你預備，全程更有私人管家提供悉心的照顧，媽咪真正唔使做家務嘅日子可能就只得呢兩日，子女們，識Do啦！

2日1夜豪華之「女」
A.勞斯萊斯接送

酒店會先安排司機揸住勞斯萊斯接載媽媽到酒店，唔使舟車勞頓。入到套房歎番個香薰按摩浴後，更安排了周麗淇、李嘉慧等名人指定的星級髮型師KevenLeung，替媽咪設計新髮型。恤個靚髮後，再由湯盈盈及應采兒等藝人的御用化妝師SidneyTam化番個靚妝，報名參加香港小姐咯！

■由勞斯萊斯接載到酒店，其他家庭成員則有平治轎車接送。

■入住總統套房後，媽媽先在主人套房按摩池享受香薰浴，舒緩身心。

■由周麗淇指定髮型師恤髮，湯盈盈御用化妝師上妝，瞬間變靚太。

B.魚子醬做早餐

除了第2天晚上到欣圖軒享用的8道晚宴外，你足不出戶都可盡享酒店提供的美食，包括魚子醬香檳早餐。坐在2,500呎的花園中，邊看維港景色，邊享美食。快樂，多少都要靠金錢嚟堆砌嘅！

■(上)清蒸石斑配蟹肉、吞拿魚鵪鶉蛋沙律均獲得「最佳水療中心菜譜」的美譽，其中前者是晚餐的其中一款選擇。

■2,500呎花園內睇住維港食魚子醬加香檳做早餐，夠豪喇啩!?

■第一個晚上酒店會提供香檳雞尾酒，居高臨下欣賞「幻彩詠香江」。

C.65吋大電視「影院」

7,000呎套房又點捨得走？足夠你玩成日，因為單是客廳內的65吋大電視已有迷你電影院的感觀享受，又或者可以齊齊唱Ｋ、打麻雀，而且酒店啱啱引入咗水療界著名品牌KerstinFlorian，荷李活女星如查理絲泰朗、麗絲蕙絲潘等均為捧場客。媽媽在享受過2日1夜豪華旅程後，將獲贈該品牌價值$5,500的護膚套裝，母親節過後都可以keep住咁索！

母親節總統套房2日1夜套餐
價錢：$188,888
日期：5月13日至14日
查詢：27211211（洲際酒店）

■客廳內的65吋大電視十足迷你電影院，可以唱Ｋ，手痕又可以開枱打麻雀。

■呢套價值$5,500的護膚紀念品會送畀媽媽，真係豪得交關！

帶媽媽升天……玩咯！

呢個飛行餐宴，先坐直升機享受15分鐘港空遨遊，隨後於酒店餐廳品嚐晚膳。今個母親節半島酒店便為媽媽設計了一個EarlyDining的餐單，黃昏時分俯瞰香港美景後，便可跟媽媽大擦一餐。

■雖然只係15分鐘，但已經足夠飽覽維港兩旁地標，加埋個靚靚日落……好彩媽媽無畏高症啫！

維港送太平洋美食

坐完直升機，一家人可到滙集太平洋美食的Felix餐廳享受黃昏套餐，加上眼前嘅維港景色，一家人好似去咗旅行一樣。

半島酒店飛行餐宴
價錢：$3,680-$4,840（2-4位）
查詢：28020200（Heliservices）

■扒照燒汁三文魚配辣豉油炒飯、果香醬油汁及三文魚子，以辣豉油調配十分香辣新鮮。另可選擇醬汁燒乳豬排骨配薯茸及豆豉橙汁。

瑞典按摩+Spa靚太好易做

要將班馬騮養大成人真係有苦只得媽媽知，腰痠背痛唔在講，精神壓力都唔嘢小，請媽媽去浸Spa啦！呢個啱晒媽媽嘅treatment套餐，會先來個瑞典式按摩，有助舒緩肌肉疲勞，刺激神經及血液循環，以減低身心壓力，再配合酒店招牌按摩油按壓，更有效加強淋巴排毒，加埋其他的手部按摩及抗衰老的面部護理療程，靚太唔易做？做戲啫！