據聞喺五一黃金周，內地市民除咗湧嚟香港自由行，好多同胞都留喺內地消費，其中一個消費項目就係排隊買樓，唔怪得祖國銀行加息，但大陸地產股仍然有升冇跌啦。
唔知係咪樓盤銷情好，雅居樂管理層要同各位小股東分享喜悅心情，雅居樂今個月18號舉行嘅股東會實行賣大包。
嗰日雅居樂會喺中環麗嘉酒店舉行股東會，之後各位股東記住留低食埋晏先好走，因為雅居樂Book咗麗嘉嘅自助午餐請股東食餐飽，據聞麗嘉嘅自助午餐未計加一每位要258蚊，管理層都算大手筆。
咁仲唔止，食完晏，夜晚仲有餘慶節目，就係聽許志安、鍾鎮濤同陳慧珊嘅演唱會，仲有鋼琴王子陳雋騫同場演奏。各位雅居樂股東就嚟會收到一封邀請函，憑函換飛，雖然雅居樂包咗灣仔會議展覽中心Hall3個場，可以坐7、8千人，但除咗請股東，佢哋仲請埋雅居樂嘅香港業主，所以股東都係早啲換飛。