夏佳理都算腳頭好，做咗港交所（388）主席冇耐，港股就升破萬七兼市值首度突破十萬億元，若其任內能令港股日均成交升至千億元就更加冇得頂。以現時港股每日成交金額300-400億元計，僅及市值的0.3-0.4%，芬佬認為不成比例，升至千億元才算正常，屆時港交所股價升破高盛的68元目標價絕對唔出奇。
新鴻基公司動作多
傳聞持港交所接近5%的新鴻基公司（086），近排動作多多，除獲得認購權增持卓健亞洲（593）外，又想向聯合集團（373）收購聯合財務，刺激股價勁升12%至8.35元。
聯合財務除咗本身的私人貸款業務外，亦持有建屋貸款（145）的75%股權，如果新鴻基公司成功收購聯合財務，可能需要向建屋貸款提出全購。建屋貸款的貨源睇嚟歸晒邊，罕有成交，噚日收報1.50元，冇成交，冇起跌。新鴻基公司今次的收購行動，估計要大量資金，唔知使唔使減持港交所股份套現呢？
聯集除咗揸住聯合地產（056）74.93%外，主要業務就係持有聯合財務。聯集噚日升6.65%至20.05元，市值50.32億元，扣除聯地74.93%股權的市值37.62億元，聯集本身的市值僅12.70億元。聯集仲有冇得升，就要睇吓聯合財務值幾錢。
市場傳出儀征（1033）的大股東中石化（386），可能將儀征的私有化計劃改為出售儀征股權，頓時令其炒私有化的憧憬大減，股價開始腳軟，噚日逆市挫6.45%至2.175元，成交達1.9億元。
近排市場愈來愈多公司集資，以及股東減持舊股套現，噚日北控（392）又有股東減持5000萬股舊股，相當於8.032%已發行股本，套現逾8億元。翻查資料，能夠沽出5000萬股的股東，唔係大股東京泰實業就係德銀。
阿虎