選委會有份選特首，梗係個個都吼住呢個地盤啦，連政府都不容有失，容乜易煲呔俾啲猛人挑戰到㗎，所以佢哋暗地裏都做好多嘢。
噚日金勞詹踢爆早前有曾班子成員搵佢，開宗明義話希望金勞詹賣個順水人情畀政府，喺選委會度幫幫手，搵番啲友好喺金融服務界選吓。點知呢個金勞詹一啲都唔領情，一口拒絕人哋，話自己唔可以好似人哋咁爭住做俊傑，但係，佢都算對煲呔不俗㗎喇，事關佢應承咗，話唔會喺選委會「搞事」。
問金勞詹個界別多唔多民主派，佢就話梗係唔多，反而銀紙派就好多噃，真係好貼切嘅形容。總之金勞詹講到明，只要任何人有99個提名，差1個就入到圍挑戰煲呔，佢都好樂意奉獻自己嘅神聖提名。
傳真︰2623-9278
電郵︰[email protected]