呢排緋聞多多嘅許志安，一時傳佢同鄭秀文（Sammi）舊情復熾，一時又傳同女助手「細佬」日久生情，但前晚佢就孤伶伶，冒住紅雨警號同一男性朋友蒲吧，一齊摸吓酒杯底傾男人經。
前晚安仔同男性友人去咗梅艷芳生前嘅經理人王敏慧喺跑馬地開設嘅酒吧消遣，蒲到凌晨1點左右至走。
「𡃁仔，喺度影乜呀？」
因為當時落緊雨，戴冷帽、着連帽衞衣同短褲嘅安仔就頭耷耷行後巷，仲連行帶跑衝去隔籬街上朋友架車，好鬼狼狽。當佢見到記者影佢嗰位型男朋友時，就態度勁寸咁同記者講：「𡃁仔，喺度影乜呀？」上車之後，安仔又用手掩面，全程鬼鬼祟祟。
湯盈盈前晚睇完《職業特工隊Ⅲ》首映後，亦約咗劉曉彤、王賢誌同司徒瑞祈落同一間吧，離開嗰陣湯盈盈好友善咁同記者打招呼，仲話：「我冇飲酒呀，飲檸蜜，要揸車吖嘛！」不過向來揸車技術麻麻嘅佢，載埋劉曉彤上車後，要喺倔頭路掉頭，現場見佢揸到騰騰震，在場記者即時全部放低晒相機投降，冇人敢騷擾佢開車。
