又係賓卡！繼花旗陳子政及中銀和廣北之後，又點會少得股價創新高嘅滙豐大班鄭海泉呢？鄭大班呢排驛馬星動，復活節返完祖國冧同胞，上月底就先去新西蘭，再落澳洲和番，仲落埋球場擲銀（圖），風塵僕僕，Office經常都擺定個行李篋，真係話走就要走！
鄭大班話晒係亞太區主席，澳紐係佢嘅屬地，上任之後，梗要去同當地商界聚餐sayhello，再為班員工打吓氣，當佢喺4月30號落到墨爾本嘅時候，啱啱撞正間行贊助咗兩年嘅欖球隊出賽，咁佢梗係要入鄉隨俗，喺4萬個觀眾面前，做埋選場嘅嘉賓，仲坐足全場！
話說滙豐贊助嗰支荷頓鷹隊，以前都算威過，但舊年成績就麻麻，唔知當日係咪知道有猛人觀戰，個個都打得好鬼落力，結果以一分險勝對手。而兩隊隊員，最後仲送咗件球衣，同埋簽晒名嘅波畀佢（每場得嗰8個波㗎咋！），而呢兩件紀念品，家吓就放咗喺大班個Office入面，想睇就去敲大班道門啦。