恒指再升158點，上破萬七。滙控（005）繼續做火車頭，再升1.40元，收137.30元。周一推介嘅滙控C輪2228，收1.01元，兩日夾埋急漲80%。滙控9RSI上到79，再升些少就會唞唞氣，賺錢滙控C輪準備先計數，袋錢落袋，等回吐再兜過，實行密執密食。
聯通（762）前日升半蚊，昨日再升4毫，收7.50元，更加顯得中移動（941）有彈番上去可能。中移動昨日回升0.30元，昨日推介嘅C輪4451見過53仙，收49.5仙，升2仙，繼續昅實。
電盈C輪9773：電盈（008）收5.30元，升0.10元，有想行想行姿勢。估計會炒吓落後，執件C輪先。炒落後，可以話係無大志行為，但勝在大市如果回吐，落後股份跌落去都冇咁傷。
電盈C輪冇得揀，得9773諗得過。隻輪6月尾夠鐘，輪價47.5仙，負溢價0.5%，槓桿率11.2倍（有效8.8倍），引伸波幅27.1%。
領滙C輪4509：新世界（017）與華置（127）彈彈跳，領滙（823）牛咗好耐，都怕有機會爬番上去，買啲C輪冇蝕底，對象只得4509買得過。
隻輪7月下旬到期，輪價22.1仙，溢價2.4%，槓桿率7.6倍（有效6.1倍），引伸波幅32.4%。
章盛