PAAG，近期最令女人聞風喪膽嘅4隻英文字，與其膽博膽盡地一煲隆胸貼錢買難受，倒不如學整中式豐胸點心，雖則的的骰骰，但起碼保證成份絕對天然，連擁有34C偉大身材嘅楊思琦都話：「效果可能無咁顯著，不過日子有功實見效嘅。」
記者：陳慧茵
攝影：伍慶泉
鳴謝：譚棟師傅@逸東軒
香港逸東酒店（27101093）
女人想豐胸都好正常吖，不過PAAG咁恐怖又有後遺症就真係太危險喇……我寧願食多啲天然食物豐胸，再唔係咪做多啲運動囉！
燕奶木瓜酥 同時養顏
價錢：$30/4人（20件）
需時：40分鐘
身材有目共睹嘅思琦不諱言：「我好鍾意食木瓜㗎，貪佢夠甜又多汁，食甜品亦最鍾意食木瓜燉雪耳。」今次加埋養顏燕窩同白滑牛奶，相得益彰。
材料：夏威夷木瓜1個、砂糖15両、牛油3両、粟粉11両、鮮奶2斤、椰漿6両、麵粉16両、豬油5両、清水4両、燕窩8錢
煮法：1.木瓜去皮去核切粒，加2両牛油至鑊中，放木瓜及6両砂糖以中火煮15分鐘至溶解，加入8両粟粉煮成木瓜餡；
2.燕窩浸過夜，牛奶、砂糖5両、椰漿、牛油1両以慢火煮10分鐘，加入粟粉3両煮至滾起製成牛奶餡，加入燕窩後放涼；
3.豬油及8両麵粉混合製成「油皮」，其餘麵粉、砂糖4両及清水拌勻製成「水皮」，以油皮包裹水皮，搓成長條狀對摺，重複3次後搓成圓柱狀，𠝹成正方形粒狀後按扁攤薄，放入木瓜餡及鮮奶餡封口，炸至表面金黃即成。
貼士：炸木瓜酥時先以慢火炸5分鐘，再轉大火炸2分鐘，可以逼出酥內油份。
三豆上素餃 狂吞3件
價錢：$30/4人（20件）
需時：25分鐘
坊間盛傳多食黃豆可保乳房青春健美，思琦都話：「我經常飲豆漿同食豆腐花㗎，媽咪又會成日煲腐竹糖水畀我飲……上素餃比較清淡，不過材料夠豐富，仲好有益㖭。」此小點的確最得思琦歡心，訪問期間連食三件仍面不改容。
材料：黃豆、毛豆各2両、榆耳、黃耳各4両、小棠菜、大豆芽各3両、澄麵、生粉、韭菜各5両、鹽、糖適量
煮法：1.榆耳、黃耳浸過夜瀝乾水切粒，小棠菜切粒，黃豆浸過夜後瀝乾水，加毛豆、大豆芽、水放鑊內炒熟，鹽及糖調味製成餡料；
2.韭菜洗淨加水攪拌成汁液，加入澄麵、生粉同煮滾，放涼後打勻，以手搓成長條狀𠝹成正方粒，搓開後釀入餡料，封口放蒸籠用大火蒸5分鐘。
貼士：搓皮時逐少撒上生粉可令表皮更乾身。
花生糯米糍 打包拎走
價錢：$20/4人（20件）
需時：1小時15分鐘
花生有催乳功效，是產後孕婦進補必備品，平日愛食甜品的思琦一見糯米糍便雙眼發光：「平時食多數係花生餡，今次加埋合桃同芝麻，口感好豐富，味道好香喎！」難怪師傅問打唔打包拎走時，思琦即刻笑晒點頭。
材料：糯米粉8両、砂糖10両、水12両、花生5両、合桃5両、芝麻3両、椰絲適量
煮法：1.將糯米粉、水及4両砂糖拌勻，隔水以中火蒸30分鐘製成糯米皮；
2.花生、合桃炸香後放涼並壓碎，加入芝麻、椰絲及6両砂糖拌勻製成餡料；
3.逐少切開糯米皮，釀入餡料後搓成圓球狀，滾上椰絲，以中火蒸30分鐘即可。
貼士：用凍水開糯米粉可令麵糰更軟熟，蒸煮時間太耐表皮會變嚡㗎！
醫師講豐胸
食療豐胸成效眾說紛紜，擁有40年經驗的中醫師吳德倫挺身講解，立心豐胸女士要記實喇！
木瓜：含豐富維他命A及C，坊間流傳有豐胸功效，中醫角度而言則有以形補形功效，與花生、肉類同煮更有明顯功效，多吃亦可令皮膚更嫩滑。
黃豆：所含物質類黃酮能提高體內雌激素水平，皮下脂肪亦會增加，對脂肪組織為主的胸部發育尤其見效。
花生：含脂肪量高，多食可以令乳房更豐滿，傳統婦女產後均會食花生豬手增加乳汁，煮溶花生效果會更明顯。
