女子組合Cookies由9餅刪減至4餅後，成員鄧麗欣率先彈出，成為緋聞多多的人氣餅女，另一成員兼樂隊PingPung主音吳雨霏（Kary）亦不執輸，前日與貌似諧星「如花」李健仁的年輕男伴暢遊銅鑼灣，煙韌逛超市挑選雪糕，熱情Kary擺下冧酒櫻桃雪糕陣，當場令「少年如花」暈大浪。
女子組合Cookies成員兼樂隊PingPung主音吳雨霏，入行以來一直緋聞甚少，但今年忽然桃花不絕，繼上月被傳與陳冠希老友Kevin拍拖後，前日又與另一新歡結伴到銅鑼灣逛超級市場，兩人表現親暱，驟眼看來與熱戀拖友無異。
有講有笑
頭並頭齊選雪糕
前日下午約6時，沒化妝的Kary戴上cap帽、穿便服及涼鞋，與男伴雙雙現身時代廣場的city'super超級市場。現場所見，該名男伴年約20歲，身穿白T恤、闊身褲及波鞋，身形健碩，樣貌酷似屢次在周星馳電影中反串女人的「如花」李健仁，雖然其貌不揚，但站在Kary身邊卻出奇地相襯。
現場所見，Kary與少年如花在超市內的雪糕專櫃細心挑選雪糕，兩人頭碰頭、肩並肩黐到實，手指指地齊齊研究雪糕種類，其間Kary更試吃冧酒櫻桃及熱情果等味道的雪糕，滋味得舔舔脷，令身旁的少年如花看至暈其大浪，結果Kary買了半加侖裝的雪糕，然後再與男伴逛零食專櫃，沿途有講有笑，前後花了約20分鐘掃下大堆脆卜卜零食。
Kary離開超市時，與少年如花各自拿着1袋戰利品，兩人齊齊漫步到街外的士站排隊候車，其間繼續情投意合地談至雞啄唔斷，後來少年如花接到電話，Kary亦望着他咪咪笑。不久Kary發現有記者在場拍照，少年如花即撇下Kary快步走進地鐵站，邊行邊打手機短訊，還慌張地煲煙。至於被記者撞破玩煮飯仔好事的Kary，則一臉沒趣地獨自乘坐的士返回跑馬地寓所。
相識多年
「佢係我中學同學」
記者昨日致電向Kary求證與少年如花拍拖之事時，她例牌否認說：「梗係唔係男朋友啦，佢係我中學同學，識咗成5、6年，佢𠵱家喺北京讀緊大學，放假返嚟香港玩，趁有時間見一見，係拍拖嘅話，都唔會大膽到帶佢出街。」
提到Kary與少年如花逛街時表現甚sweet，她大笑說：「太核突啦！冇可能，佢係我好朋友，bestfriend，諗起都核突，唔係sweet，係兄弟啫。」
既然不是拍拖，為何一見記者即時彈開？Kary又解畫說：「我見唔到有記者喎，但見到好似有啲閃嚟閃去（指閃光燈），其實佢搭地鐵㗎，陪我等車啫，我諗佢今次應該幾開心，因為終於見報啦。」
採訪、攝影：娛樂突發組、朱倬誼
