花旗國牛仔總統嘅支持率，大家都知道每下愈況，跌得仲快過美金。聽聞，連花旗國右翼電視台FoxNewsChannel做嘅最新民意調查，都話呢個右翼牛仔總統得31%支持。咁得31%嘅支持有幾大鑊？花旗國選舉都好似特區嘅選舉一樣，每個黨都有鐵票，而花旗國共和黨同民主黨就差唔多每次選舉都有35%嘅人，唔會理個黨派邊個出嚟選，都會支持佢，就算個黨派隻狗，佢哋都一樣好少理，繼續自動支持。咁每次花旗國選舉，共和黨同民主黨，就會喺鐵票之上爭取游離票，從而定輸贏。
不過今時今日，牛仔總統嘅31%支持率，就代表連共和黨嘅鐵票都唔支持佢，莫菲佢哋覺得牛仔總統就連狗都不如？可能好似花旗國人民話齋：「個黨派隻狗出嚟選，都要支持佢，因為始終都係我哋隻狗，就算對面派個人出嚟選，都唔係我哋嘅人。」咁根據孫柏文嘅分析，牛仔總統應該係人，唔係狗，不過就有共和黨嘅鐵票，覺得牛仔總統已經背離黨嘅教訓。而孫柏文覺得共和黨鐵票當中，最唔開心嘅一定係嗰啲「華爾街派」嘅人。華爾街派人士鍾意睇到嘅政策係，貿易自由增加、放寬移民政策、同埋減稅，不過唔係就咁減咁簡單，而係要政府減稅嘅時候，一定要同時減少政府開支。
減入唔減出
入唔減出
睇番今日嘅花旗國，貿易自由增加呢樣嘢，差唔多死梗，多得啲希望越南農民同泰國農民一世捱窮嘅韓農支持，WTO差唔多已經功效盡失。好多華爾街派人士都覺得，牛仔總統喺促進自由貿易問題上，唔好話冇做嘢，直情好似韓農一樣，搞破壞。
講花旗國移民政策，𠵱家洛杉磯同其他花旗國城市，差唔多每個禮拜，都有人因花旗國國會有議員要求收緊移民政策，而去示威遊行。仲要唔係小貓三四隻，郁親都幾十萬人，最緊要係參與人數唔係主辦單位提供，而係警方嘅官方數字。華爾街派人士又睇唔到牛仔總統喺呢個問題上做到嘢，所以好嬲佢。
咁講到減稅，原本呢個係牛仔總統王牌，因為稅佢就真係減咗，仲要減咗好多，不過完全冇減過開支，令到政府赤字飛升。不過，花旗國就唔似我哋特區咁，有埃及妖后嘅嫁妝，所以政府如果有赤字，就要借錢填氹。
派軍隊搶錢還債
咁呢幾年，牛仔總統嘅花旗國政府借咗1.03萬億美元嘅錢，呢個天文數字有幾嚴重？花旗國立國，由唔識講大話嘅華盛頓到好識講大話嘅克林頓，個政府都只係總共借咗1.01萬億美元。短短五年之內，牛仔總統已經累積國債多過佢所有前任總統嘅總和。就算花旗國可以派軍隊周圍去搶掠還錢，我諗佢啲花旗國借據，都要提供更高嘅回報率，先至可以吸引到人繼續買。
最後，好多花旗國人士都猜測，點解就算牛仔總統嘅支持率咁低，佢都冇表示過會撥亂歸正。根據孫柏文嘅分析，其實好簡單，牛仔總統成日都覺得被人睇小，成日都被人拎嚟同佢老竇老布殊比，所以好似牛仔總統呢啲咁好勝嘅人，乜嘢都想超越佢老竇。例如，老竇冇搞掂伊拉克狂人薩達姆，佢就出手搞掂，又或者當年有人話老布殊冇減稅，所以佢就大大力減。佢老竇曾經因為海灣戰爭第一集，而取得70%以上嘅支持率，佢亦都喺九一一嘅時候有80%以上支持率，所以尚算超過老布殊，𠵱家剩番未成功超越老布殊嘅項目，就只得最低支持率。老布殊在任期間最低支持率係29%，咁牛仔總統𠵱家嘅支持率係31%，所以仲差少少先至超逾到老竇。我都希望牛仔總統可以了結心願，瞓得着覺，所以，牛仔總統努力啊！
孫柏文