華華幾時都話，唔理十八廿二青春少艾，定六七十歲骨頭卜卜脆嘅婆婆級人馬，千祈唔好睇小女人。好似華華偶像六嬸方逸華咁，雖則行年七十有一，但仍有心有力權傾將軍澳電視城，噚日仲做埋TVB署理董事總經理。
話說TVB噚日宣布，1978年入TVB由公司秘書做起的董事總經理鬼佬費道宜，以「全身投入私人業務」為理由遞咗信唔Do，月底生效，董事局正物色合適人選補位，暫時由六嬸頂住先！咁點解費生會走？六嬸又會署理幾耐呢？
其實早響舊年，外邊經已估TVB真正話事人六嬸會整頓一下權力核心，換入方系人馬話事，即係陳志雲同埋樂易玲等，同時佢又邀請前TVB老臣子陳禎祥回巢做副董事總經理，變相廢埋由梁乃鵬、何定鈞同埋費生組成嘅三頭馬車。咁事實都有眼見啦，非自己友嘅何生經已退休，係自己友嘅梁生就仲有得傍住六嬸出出入入，咁費生呢頭北愛爾蘭馬，唔使問直頭係非我族類其心必異，當然要同電視城永別啦！至於話六嬸會署理幾耐，佢係單位話事人，想幾耐咪幾耐囉。
李華華
讀者如有任何意見或報料，歡迎發送電郵至[email protected]。