日本漫畫家岸本齊史創作的人氣忍者作品《NARUTO-狐忍》，紅遍動漫界，移植到遊戲機上亦吸納到一班Game迷捧場。最新一集《NARUTO-狐忍-最強忍者大結集4》，承接上回《狐忍3》的玩法，配合NDS的上下畫面，上畫面顯示戰鬥情況，而下畫面則可用Stylus使出各種忍術；比起舊作，今集的角色選擇不但增加至30個，而且仲可以用NDS的無線通信功能，搵齊4個Friends玩對戰，打得更激烈！
記者：招佩珊
《狐忍》Hit爆日本動漫界，舊年4月NDS就推出了《狐忍3》，以漫畫作為遊戲故事大綱，再跟足原著故事的奧義忍術，真係打到Fans們熱血沸騰。今集《狐忍4》繼續發揮NDS獨有雙畫面功能，上畫面打鬥場面，下畫面忍術選擇，再加上奧義忍術時，要用Stylus在TouchScreen上打圈、向直、橫畫，甚至向個Mic吹氣先可發動忍術，真係打到好似狐忍上身！而且今集無論在角色選擇、任務數量、畫面設計及忍術選擇，都較上集加料炮製，絕對必玩。
自組忍術見招拆招
遊戲開始時，要先行揀忍者級數如「見習」或「上忍」，前者是初級程度，有18個任務要完成，全屬低級的D難度；至於「上忍」，即要成為一流忍者，有成64個任務，由最低難度的D級開始，接着是C、B、A，最後是最高難度的S級。當有幸打到S級後嘅隱藏關，主角居然首次變身究極嘅火狐狀態，而終極首領雖然幾強幾難打吓，不過若識得加入春野嘅回復之術入奧義組合嘅話，到時跳上頂樓「回夠氣」先再隻抽，勝算自然大好多！
其他過關條件變化都好大！較難打是D級「擊倒10隻蝙蝠」，仲要冇大招用，筆者都只可碰運氣第17次「符碌」過關，真係祝大家好運！比舊作進步是當選擇角色後，除了本身耍家的忍術外，亦可從其他角色選取忍術自用，換言之，可因應唔同任務自度忍術組合，發揮最強攻擊力，例如日向的拳腳相當強，特別是其「八卦六十四掌」，呢招連環拳一出好過逐拳逐拳打對方，快夾爽；另外，春野的回復之術可補充能量，打到去S級遇着強對手都無咁快死。
場景畫面細緻
作為動作Game，角色選擇多固然好玩，但若然打鬥場景多層次，多閃避位、多走盞位可以跳來跳去，打得會更過癮。《狐忍4》的場景當然以日本景為主，當中有森林、溫泉、竹林、鐵橋，以及好有東瀛風味的古舊建築物等；遇上有建築物的場景，可以由地面一邊打，一邊跳上1樓、2樓……打到去屋頂，而且場景的構圖設計做得仔細，好有層次感，逼真度高，配合埋忍者片必備的音樂如「篤篤篤」的敲竹聲，打得更有Feel。另外，在使出強力忍術時，會有特別效果貫穿上下畫面，打Game都有如睇動畫感覺！
PROFILE
遊戲類型：ACT 對應機種：NDS
遊玩人數：1人（可2-4人連線）
開發商：TOMY
售價：$198
售賣點：DreamStore（25753285）地址：灣仔東方188商場G04、256號舖
