蘭西情報課:廣州樓熱賣直迫深港

蘭西情報課:廣州樓熱賣直迫深港

內地樓市喺加息壓力下,五一黃金周新盤銷情仍有好表現,內地個別省市嘅生活指數正不斷越級提升,唔理你接唔接受都好,呢個發展趨勢事實上真係發生緊,而且步伐仲行得好快,甚至快到好多自滿嘅香港人根本冇諗過嘅地步。
以廣東省首府廣州市為例,隨住舊城改造同埋一系列新區開發,近幾年廣州樓市旺丁又旺財,新盤售價亦開始直迫深圳一線地區水平,例如呎價近千銀嘅新樓璟泰.雄峰,4月中開賣,大半個月已賣出超過200伙,喺當地咁多新盤競爭之下,反應算唔錯。
該盤坐落珠江新城,毗鄰東山區,係最被看好有升值潛力嘅新發展區。置業國際話,物業740餘至1500餘呎,港澳台買家比例有一成半,投資成份都唔少。𠵱家發展商仲送緊置業利是或者鑽石促銷,黃金周後可能會減贈品甚至加價。
如果閣下對新區冇咩興趣,可以考慮吓市中心新盤,由瓜哇控股發展,位於荔灣區嘅西門口廣場,第2期住宅項目啱啱接受認購登記,5月中開賣,單位約650至1500呎,同璟泰.雄峰嘅單位差唔多大細。
電郵地址:[email protected]