呢排中環賓卡界，最人氣嘅英文字，除咗QDII，仲有IFC。但呢個IFC唔係國金中心，而係InvisiblefromCausewayBay。
班賓卡話，香港嘅空氣愈嚟愈差，又多煙霞又大霧，就算近到喺銅鑼灣望過去中環，都未必睇到國金中心！
雖則QDII仲未有詳情，但特首已經好心急咁督促大家去敲門，傳媒見到銀行金融界中人，問題亦離唔開呢4個英文字，小股民對同QDII有關嘅股都熱烈追捧，當個個講到鬼咁興高彩烈之時，睇怕只有一個人最無奈，呢個就係人行行長周小川，事關有咁多人敲佢道門，仲使瞓嘅？
不過，據聞周小川都好識享受人生，鍾意飲紅酒同食雪茄；出訪時，更會同隨團手足落吧鬆一鬆，作風都算open，中環賓卡睇怕唔使華華教，都識帶乜手信去敲門喇啩！