大市唔落，再上，恒指升206點，收16868；期指更大升240點，收16769，雖然低水近100點，但計番有成20隻大藍籌除息嘅因素，期指實際上已係高水。
中資股仲犀利，H指重上7000大關，收7008，大升173點，話到明大藍籌同大國企都歸晒邊，基金同大行上晒手，後市梗係易升難跌。現時大市在17000大關樓下整固，消化完獲利貨後，就會再破關而上。
中新集團（563）噚日大發力，高見1.22元後回收1.19元，升0.12元，升幅11.2%，股價亦重上10日同20日線之上，4月中高位1.27元至1.29元會有阻力，估計此水平需要整固一段時間，才能再上。
油價在高位嘅走勢仍然好堅挺，3隻大油股都有好表現，小油股中油（香港）（135）升幅就最大，有4.3%，收4.85元。油價若衝破75美元高價，油股走勢亦會同步，以中油為例，5元係一個關，一衝破就要追進，博賺20%至30%。基金在高位仍然入市，揸重貨，跟得過。
野村訂目標價5.04元
摩根大通除增持中油外，亦大手吸納晶門科技（2878），買咗4880萬股，作價3.35元，涉資1.63億元，最新持股量係7.38%。晶門噚日收3.60元，升0.15元，升4.3%。
晶門今年高價上過3.825元，今次再發力，有機會向更高位推進。晶門係基金股，除摩根大通外，其他持貨較多嘅有CWBankofAUS（7.01%）、GenesisFund（6.07%）、VP（5.01%）、新加坡政府（4.99%）同WintekCorp.（4.98%）等等，大大小小夾埋，超過40%。野村證券係晶門嘅大好友，投資評級「強烈買入」，目標價5.04元。里昂證券預期晶門06年（12月年結）PE13倍，估值吸引，維持「跑贏大市」嘅投資評級。
晶門05年營業額3.94億美元，升28%；盈利7625萬美元，升31.6%，每股盈利3.12美仙，全年每股派息0.19港元。今年市場價格雖仍有下調壓力，但跌幅已收窄，而且集團出貨量大，抵銷跌價影響，業務增長來自STN及OLED，特別係後者出貨量會倍增，公司有信心業務增長可與市場同步，甚至超過。
郭兆誠