內地「五．一」黃金周基本上禮拜一先開始，但由於黐住周、六日，好多自由行或者鴨仔團，早兩日已經落咗嚟，唔少商場提早迫爆。人流增加帶動商場租客營業額上升，大業主亦欣然向傳媒報數，雖然係早咗啲，但好嘢唔怕四圍唱，最緊要大家都能夠感受到嗰份嚟自內地、超級龐大消費人口嘅經濟威力。
近年搞商場推廣最勤力嘅一定係新地，當大部份地產商集中講五一當日，或者禮拜六、日及一嘅人流數字時，新地鍾秀蓮已經將資料更新至噚日──即係過去4日嘅統計數據：將軍澳東港城有42萬幾人流，比舊年同期多咗五成；銅鑼灣世貿中心有15萬幾，多咗四成；最近大陸嘅上水廣場，同樣有42萬幾，多咗三成。
至於已經被視為新地旗艦商場嘅觀塘apm，一向都好勤力嘅馮秀炎話，佢哋由5月1日開始，一連7日舉行夜遊潮流街，大搞高檔室內大笪地，第一日已經吸引2萬人次入場，生意額近100萬，有個北京豪客更加大花6萬銀，即場買咗堆數碼相機、手錶、鑽石、化妝品……內地同胞，真係今時唔同往日！
另一個吸引好多內地團嘅新場係大角嘴奧海城，咁啱大業主信和近排推售荃灣萬景峯，場內多咗個示範單位，結果啱啱嘅禮拜六、日及一，有80萬人流，比舊年多咗一成半。
電郵地址：[email protected]