喺一年前，NDS憑《任天狗》扭轉咗香港普及率遠遜於PSP嘅局面，當時行街搭車經常遇到拖住條狗喪玩嘅男女老幼，撻着Wi-Fi四圍等換道具嘅行為，可能你同我都做過！𠵱家事隔剛好一年，PSP拎咗全球知名嘅大頭狗嚟出Game，至於NDS亦唔執輸又有卡通到爆嘅茶犬，兩者仲要差唔多玩法，想話佢哋唔係幫《任天狗》作崇高致敬都唔得！
呢隻《TheDogHappyLife～幸福小狗生活第1彈～》好明顯係以《任天狗》作為參考嚟做，由畫面表達、大致玩法以至狗狗反應，都同《任天狗》似到9成9！最主要唔同當然係班狗仔變晒做大頭狗，啱晒鍾意呢個品牌產品嘅玩家。主旨方面，佢標明係以同狗狗一齊度過美好時光，互相好好溝通作為目標，所以同佢玩小遊戲，以及摸吓毛呢啲指定動作固然唔少得，而且仲同《任天狗》一樣，可以用個Analog掣同狗狗掃勻全身，不過將Stylus筆變為一個圓形Analog掣，撚起狗嚟硬係少咗啲手感！
狗款多又Cutie
《TheDog》不嬲都係Sell得意可愛兼種類多，𠵱家上得PSP呢個平台做遊戲，真係點都差極有個譜；同當年任天狗一樣，狗款有16種，不過狗種有少許差別，分別有法國老虎狗、斑點狗、芝娃娃、拉布拉多尋回犬、蝴蝶狗、金毛尋回犬、邊界牧羊犬、八哥、西施、約瑟爹利、比高、德國狼狗、柴犬、臘腸狗、馬爾濟斯狗和貴婦狗。想佢哋靚啲不但可以着件靚衫，仲有Set好架步嚟影張沙龍相，扮到好似貼紙相咁就真係Good喇！
冇筆欠互動 靠畫面搭夠
《TheDog》好多方面都叫做得唔差，奈何佢幾乎毫無新意，點子好多都明抄《任天狗》，加上冇得用Stylus筆同隻狗做直接互動，靠Analog掣效果點都冇咁好，加上冇Mic教狗狗指令，同最精粹嘅「連線撚狗」都欠奉，因此絕對冇吸引力令人為咗佢出機。不過強勁嘅畫面處理能力仍然係PSP強項，遊戲中狗狗像真度做得相當高，毛髮層次亦好分明，另外可裝落隻狗嘅道具又為數不少，以$188嘅價錢，都叫OK抵玩！
Profile
機種：PSP
廠商：YUKE'S
類型：SLG
人數：1人
發售日：發售中
售賣點：DreamStore（25753285）
地址：灣仔東方188商場G04、256號舖
同場加映：NDS茶犬亂入挑機！
至於NDS響同日推出嘅《茶犬的房間DS》，基本玩法同《任天狗》簡直係倒模咁倒，都係玩盡支筆同個咪，摸吓佢嗌吓佢呢啲指定動作就固然唔少得。但有兩點係《茶犬》比較優勝嘅，首先係設有七大地點俾人進入，例如有室內設計店、玩具店和雜貨舖等，可以買嘅道具超過250件，想買電視、MP3機甚至成架鞦韆都仲得，好多仲係平時諗都冇諗過嘅頂癮物品嚟㖭！其次係佢有18種小遊戲，唔少都做得有一定可玩性，單係啤牌類就已經佔咗7隻，玩狗玩得悶都可以靠呢啲小遊戲過下日辰，同朋友DownloadPlay進行對戰亦可。如果嫌《任天狗》玩法唔夠多花臣，相信變化多端嘅《茶犬》一定有排你玩！
