五一勞動節有假放，係回歸之後嘅事，有假放，我哋點會推辭，理得佢有冇政治涵義。五月一日，瞓到日上三竿先至起身，打開張《蘋果》名采副刊一睇，咦，編排唔同晒，最大特色就係統一橫排。左丁山從來唔鍾意睇橫排中文，不過，嚡，大勢所趨，古老一派如螳臂擋車耳，報紙排版效率要緊也！
寫稿人搵食艱難，可隨時被炒，大家一早心知肚明。但最慘嘅，就係日日花腦汁交稿，每月稿費就收唔到。本來同行最怕爆口響，所以左丁山知咗好耐都費事講，但係眾老友在飯局時訴苦不絕，咁又不妨講吓，何況佢哋嘅支月薪嘅記者同事，已經發起行動爭取欠薪呢。
馬場內碰到馬萬靈，笑佢呢排畀貼士幾準，係唔係因為冇稿費出，惟有靠貼士贏馬？馬萬靈苦笑話：「我都唔係最慘！」佢有馬場補貼，當然唔係最慘，後來睇報紙先至知道馬經版與印刷工人有糧出，其他記者份糧就拖住。林超人就唔同，因生產力特高，才女老婆四年生三女，要留在家中湊女，林超人惟有博命寫稿，但報館欠佢幾個月稿費，點搞呀？左丁山對林超人講：「寫稿人係無抵押債權人，報館一旦清盤，寫稿人嘅法律地位與原料供應局無異，好難收到錢。無謂蝕埋腦汁咯，立即停寫啦！」林超人係一介文人，成日吃眼前虧，佢話驚住一旦唔寫，幾個月前嘅稿費都攞唔到，正一係君子可以欺其方，反而來自內地、會計資格不被承認嘅寫稿W習慣向錢看，寫咗兩個月就立即停筆，唔再蝕底落去，一向講慣笑話，不憂衣食嘅賜官就對左丁山講：「喂，我哋班寫稿佬可以集體出售稿費，每人幾個月，加起上嚟，都唔係小數㗎！」咦，賣「應收帳款」，可以諗得過，有國際factoring公司，專做呢樣，購入價當然要有好大折讓啦。辦報紙辦得咁辛苦，欠糧欠稿費，又曾經俾業主追欠租，幕後股東究竟打乜主意呢？總編輯甚至總監都係打工仔啫，股東無謂搵佢喺前台擋箭吖。