徐克早排同記者講過話會同林嶺東、杜琪峯一齊聯合導演1部戲，初時以為老徐吹水，原來真係成事啦！部戲會喺月中開拍，係由陳國強做老細嘅漢文化公司畀錢拍，投資成千幾萬，演員有老徐愛將楊采妮、阿杜愛將任達華同古天樂，其他演員仲有胡軍同林雪，女主角只係得楊采妮，應該會有得發揮。
風格要統一
今次佢哋3位大導合作，唔係各自拍1個短篇故事，而係要向難度挑戰，佢哋會合力拍1個故事出嚟，暫定頭嗰部份由老徐拍、阿東就拍第二部份，第三部份就由阿杜結尾，3位導演都係各有唔同風格，但佢哋要聯合拍部戲出嚟之餘仲要統一風格，咁就真係幾考功夫，馮仁昭都幾期待佢哋最後會拍到啲乜東東出嚟。
